Britaniyada şlyapaların və ənənələrin yarışdığı tədbir –“Royal Ascot”dan REPORTAJ
Askot, 20 iyun, AZƏRTAC
Qatara minməzdən əvvəl dəbdəbəli şlyapalar, zərif geyimlər və eleqant kostyumlar dərhal diqqəti cəlb edir. Bu günün nə olduğunu bilməyən bir şəxs böyük ehtimalla həmin insanların hansısa ziyafətə və ya toya yollandığını düşünər. Əslində isə onların hamısının istiqaməti eynidir- “Royal Ascot”.
Böyük Britaniyanın ən nüfuzlu və dəbdəbəli at yarışı tədbirlərindən biri olan “Royal Ascot” hər il iyun ayında Berkşir qraflığında yerləşən “Ascot” Hippodromunda keçirilir. Beş gün davam edən bu möhtəşəm tədbir təkcə yüksəksəviyyəli at yarışları ilə deyil, həm də Britaniya Kral Ailəsinin iştirakı, zəngin ənənələri və dəb nümayişi ilə seçilir.
Londondan qatar yolu ilə təxminən 50 dəqiqə uzaqlıqda yerləşən Askota enən kimi insanı tamam fərqli bir mənzərə qarşılayır. Yarışları izləməyə gələn qonaqlar ciddi geyim qaydalarına əməl etməlidirlər. Xanımların şlyapa taxması, kişilərin isə kostyum geyinməsi tələb olunur. Məhz bu eleqant ab-hava “Royal Ascot”u digər idman tədbirlərindən fərqləndirən əsas xüsusiyyətlərdən biridir.
“Ascot” Hippodromu 1711-ci ildə Kraliça Anna tərəfindən yaradılıb. Rəvayətə görə, Kraliça Vindzor qəsri yaxınlığında gəzinti zamanı atların sürətlə qaça biləcəyi geniş bir ərazi aşkar edib və həmin il burada hippodromun əsasını qoyub. “Royal Ascot” isə ilk dəfə 1768-ci ildə keçirilən dörd günlük yarış tədbirindən formalaşaraq zamanla Britaniyanın ən möhtəşəm idman və sosial hadisələrindən birinə çevrilib.
Tədbirin ən maraqlı məqamlarından biri hər gün saat 14:00-da keçirilən ənənəvi kral keçididir. Bu mərasim zamanı Britaniya Kral Ailəsinin üzvləri at arabaları ilə hippodroma daxil olaraq minlərlə tamaşaçını salamlayırlar. Əvvəlcə Kral III Çarlz və Kraliça Kamillanın olduğu araba meydana daxil olur. Onların ardınca Şahzadə Anna və digər kral ailəsi üzvləri gəlirlər. Minlərlə tamaşaçı ayağa qalxaraq onları alqışlarla qarşılayır. Mənim tədbirdə iştirak etdiyim gün kral yürüşünün sürpriz qonaqlarından biri məşhur amerikalı aktyor Stanley Tucci idi.
Gün ərzində təxminən yeddi yarış keçirilir. Lakin “Royal Ascot” təkcə at yarışları ilə seçilmir. Bir çoxları üçün bu tədbir həm də dəb və zəriflik nümayişidir. Xüsusilə xanımların geyimləri və şlyapaları diqqət mərkəzində olur. Bir-birindən fərqli dizaynlar, rəngarəng və yaradıcı şlyapalar tədbirə xüsusi rəng qatır. Bəzən elə şlyapalar görmək olur ki, onlar sanki moda nümayişinin bir hissəsidir. Qonaqlar arasında ən çox müzakirə olunan mövzulardan biri də məhz bu qeyri-adi və kreativ baş geyimləridir.
“Royal Ascot”da iştirak edən bir azərbaycanlı kimi deyə bilərəm ki, bu tədbir sadəcə at yarışlarından ibarət deyil. Burada Britaniyanın əsrlər boyu formalaşmış ənənələri, kral irsi, dəb mədəniyyəti və idman ruhu bir araya gələrək unudulmaz bir atmosfer yaradır. Elə buna görə də “Royal Ascot” hər il dünyanın dörd bir yanından minlərlə qonağı özünə cəlb edir.
Bölmənin digər xəbərləri
