Bu gün Brüsselin kuluarlarında Azərbaycan Prezidentinin təklifləri üzərində müzakirələr açılır, dəstək bəyanatları verilir
Bakı, 16 dekabr, AZƏRTAC
Azərbaycan Prezidentinin başlatdığı tarixi missiya ilkin mərhələsini 44 günlük Vətən müharibəsindəki qalibiyyətlə davam etdirir. Həmçinin biz, nəinki Qafqaz bölgəsində, eləcə də regional və qlobal müstəvidə yeni siyasi, iqtisadi, hərbi dizaynın inşa edilməsinə mühüm töhfələr verməkdəyik. Azərbaycan Zəfər Günündən keçən bir il ərzində postmüharibə dövrünün yeni reallıqları ilə həm cəmiyyət, həm də dövlət təfəkkürü ilə tanış olmaqla bərabər bunun mühüm tərkib hissəsinə çevrilib. Çünki 30 ilə yaxın bir dövrdə torpaqlarımızın işğalı, beynəlxalq hüququn təsir mexanizmlərinin işləksiz qalması və nəhayət Ali Baş Komandanın rəhbərliyi ilə Azərbaycan Ordusunun bütün dünya tərəfindən qəbul edilmiş beynəlmiləl qaydaları təsbit etmək üçün həyata keçirdiyi sülhə məcburetmə əməliyyatları bölgə və dünyada yeni bir yanaşma ortaya qoymuş oldu.
Bu sözləri AZƏRTAC-a açıqlamasında Sosial Tədqiqatlar Mərkəzinin mətbuat xidmətinin rəhbəri, beynəlxalq məsələlər üzrə mütəxəssis Əziz Əlibəyli bildirib.
O bildirib ki, Qafqazın işğalçı, kiçik eposu və balaca ərazisi ilə dənizlərarası torpaqlara göz dikərək yalnız müharibəyə, qaçqınlara, ölümlərə, dağıntılara səbəb olan Ermənistan nəhayət hüququn daxili sərhədlərinin tələblərı və qaydaları ilə cəzalandırıldı, kapitulyasiya aktına imza atdı: “Prezident İlham Əliyev bu addımla bölgədə artıq müharibənin bitdiyini, sülh dövrünün başladığını və Ermənistanın müəyyən şərtləri qəbul etməsinin vacib olduğunu bir il boyunca keçirilən görüşlərdə bəyan etdi və qəbul etdirdi. İstər Soçidə, istər Moskvada, istərsə də Brüsseldə yalnız sülh, sərhədlərin müəyyən edilməsi, müharibənin aktiv fazasının birdəfəlik bitməsi, erməni tərəfinin iddialarının əbədi dəfni və kommunikasiyaların açılması masada əsas müzakirə mövzusu olub. Bu günün reallıqları isə yalnız sülh quruculuğu, ona veriləcək töhfədir. Artıq Cənubi Qafqaz bölgəsi sülh platformasına çevrilməkdədir. Belə ki, London - Pekinə, Türkiyə - türk dünyasına, Azərbaycan isə Naxçıvana qovuşur. Həmçinin Rusiya, İran, Orta Asiya, Avropa, Atlantik məkan Zəngəzur dəhlizindən keçməklə bölgəmizi rifaha qovuşduracaq. Mənfur niyyəti ucbatından 30 il ərzində bölgədə təklənmiş, kasıb və müti duruma düşmüş, nəhayət məğlubiyyətlə üzləşmiş Ermənistan üçün Azərbaycan və Türkiyə ilə nəfəsliklərin açılması da an məsələsidir”.
O əlavə edib ki, bu gün Brüsselin kuluarlarında Azərbaycan Prezidentinin təklifləri üzərində müzakirələr açılır, dəstək bəyanatları verilir. Müharibə qalibinin artıq sülh üçün missiya daşıdığı və bunun da İrəvanın müttəfiqləri ilə bol olduğu Avropada qəbul etdirilməsi böyük bir reallığın və erudisiyanın məhsulu olduğu görünür. Bölgənin xilası kommunikasiyaların açılmasında, sülh müqaviləsinin bağlanmasında və rifah yaradacaq münasibətlərin qurulmasındadır ki, Azərbaycanın səyləri nəticəsində bu proses öz həllini tapır.
Bölmənin digər xəbərləri
