BU İLİN SONUNDA DÜNYADA MOBİL RABİTƏ ABONENTLƏRİNİN SAYI 4 MİLYARDA ÇATACAQDIR
AZƏRTAC xarici ölkələrin informasiya agentliklərinə istinadla xəbər verir ki, bu ilin sonunadək dünyada mobil rabitə abonentlərinin sayı 4 milyarda çatacaqdır. Bu məlumat BMT-nin Beynəlxalq Elektrik Rabitə İttifaqının (İTU) proqnozlarına əsaslanır. Son 8 ildə mobil rabitə istifadəçilərinin sayı heyrət doğuracaq dərəcədə sabit şəkildə - hər il 25 faiz artmışdır. 2000-ci ildə planetimizin mobil rabitədən istifadə edən sakinlərinin sayı əhalinin ümumi sayının 12 faizini təşkil edirdi. 2008-ci ilin dekabr ayında isə bu göstəricinin 60 faizdən çox olacağı gözlənilir.
İTU-nun baş katibi Hamadun Turenin sözlərinə görə, bu gün mobil rabitə abonentlərinin sayı onu göstərir ki, yer kürəsinin bütün sakinlərinin informasiya və kommunikasiya texnologiyalardan istifadə etməsi texniki cəhətdən realdır.
Mobil rabitə istifadəçilərinin sayının ən ciddi artımı Braziliya, Rusiya, Hindistan və Çin kimi inkişaf etməkdə olan ölkələr hesabına təmin olunur. Bu ilin sonuna qədər həmin ölkələrdə mobil rabitə istifadəçilərinin ümumi sayı 1,3 milyard olacaqdır.
