Bundesverin öz ravvinləri olacaq
Berlin, 21 dekabr, AZƏRTAC
AFR Müdafiə Nazirliyi və Almaniya Yəhudilərinin Mərkəzi Şurası Bundesverdə hərbi ravvinlər təsisatının yaradılması haqqında razılaşma əldə ediblər.
AZƏRTAC xəbər verir ki, tərəflər müvafiq memorandum imzalayıblar. Gələn ildən başlayaraq Almaniya ordusunda ilk paqonlu yəhudi hərbi qulluqçular fəaliyyətə başlayacaq.
Onların funksiyalarına yəhudi əsgərlərin mənəvi tələblərini təmin etmək daxildir.
Potstdam Universitetinin tarix fakültəsinin aspirantı Xəmsi Abdel AZƏRTAC-ın müxbiri ilə söhbətində deyib: “Nasistlərin hakimiyyətə gəlişindən sonra Almaniya ordusunda yalnız katolik və lüteran kapellanlar qalıb. Hətta İkinci Dünya müharibəsi başa çatandan sonra da ravvinlər orduya qayıtmayıb, halbuki 1933-cü ilə qədər orduda olublar. İndi orduya alay müftilərini gətirməyin növbəsi çatıb, çünki zəmanə dəyişir”.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
