Zemfira Meftahətdinova: Azərbaycanın Olimpiya uğurları Ulu Öndərin qoyduğu möhkəm təməlin nəticəsidir
Bakı, 10 may, AZƏRTAC
Ümummilli Lider Heydər Əliyev hakimiyyətə qayıtdıqdan sonra Azərbaycanda idmanın inkişafına böyük diqqət və qayğı göstərilirdi. Məhz bunun nəticəsində ölkəmizdə olimpiya kompleksləri tikilməyə başlandı, idmançılar üçün hərtərəfli şərait yaradıldı və Azərbaycan beynəlxalq arenada böyük uğurlara imza atdı.
Bu fikirləri AZƏRTAC-a açıqlamasında Milli Olimpiya Komitəsinin vitse-prezidenti, Azərbaycan İdman Veteranları İctimai Birliyinin sədri, atıcılıq üzrə Olimpiya çempionu Zemfira Meftahətdinova Ümummilli Lider Heydər Əliyevin anadan olmasının 103-cü ildönümü ilə bağlı danışarkən deyib.
O bildirib ki, Ulu Öndər Heydər Əliyev ilə ilk görüşü 1995-ci ildə 5 Mart – Bədən Tərbiyəsi və İdman Günündə olub: “Həmin gün bütün idman mütəxəssisləri, idmançılar və məşqçilərlə görüş keçirilirdi. Ulu Öndər medalları şəxsən özü təqdim edirdi. Bu, hər bir idmançı üçün böyük şərəf idi. Həmin görüş mənim yaddaşıma həmişəlik həkk olunub”.
“Sidney-2000” Yay Olimpiya Oyunlarının qızıl medalçısı qeyd edib ki, Ümummilli Lider hər zaman idmançıların uğurlarını diqqətlə izləyirdi: “Xüsusilə mötəbər yarışlara böyük maraq göstərirdi. 1996-cı ildə Olimpiya Oyunlarında gümüş medal qazanan Namiq Abdullayevin çıxışını şəxsən izləyirdi. Hətta həmin gümüş medalı qızıl medal kimi qiymətləndirirdi. Bu da onu göstərirdi ki, Ümummilli Lider Heydər Əliyev təkcə Olimpiya Oyunlarına deyil, ümumilikdə bütün idman növlərinə böyük maraq göstərirdi və idmançılarımızın uğurlarına sevinirdi”.
Zemfira Meftahətdinovanın sözlərinə görə, dövlət qayğısı idmanın inkişafında mühüm rol oynayıb: “2000-ci il Sidney Olimpiadasında medal qazandıqdan sonra Ulu Öndər mənə dedi ki, artıq Azərbaycanda atıcılıq kompleksi yaradılacaq. Həqiqətən də, 2003-cü ildə atıcılıq kompleksinin açılışı oldu. Açılış mərasimində Prezident İlham Əliyev də iştirak edirdi. Daha sonra, 2015-ci ildə Birinci Avropa Oyunları ərəfəsində kompleks əsaslı şəkildə yenidən quruldu və həm güllə, həm də stend atıcılığı üçün müasir şərait yaradıldı”.
O vurğulayıb ki, dövlət tərəfindən göstərilən diqqət və qayğı Azərbaycanın beynəlxalq arenadakı uğurlarında özünü aydın şəkildə göstərir: “Ən böyük nəticələrdən biri Olimpiya Oyunlarındakı çıxışlarımızdır. 1996-cı ildən başlayaraq Azərbaycan idmançıları Olimpiadalarda medalların sayını davamlı şəkildə artırıblar. Bu uğurlar dövlət dəstəyinin, yaradılan şəraitin və idmançılara göstərilən diqqətin nəticəsidir. İdmançılar da bunu hiss edir və ölkəmizi beynəlxalq yarışlarda layiqincə təmsil etmək üçün daha böyük əzmlə çalışırlar”.
Bölmənin digər xəbərləri
