Butan Milli Assambleyasının sədri: Asiyada çoxtərəfli əməkdaşlıq qlobal sabitlik üçün vacibdir
Bakı, 19 fevral, AZƏRTAC
Asiya Parlament Assambleyası (APA) çoxtərəfli əməkdaşlığın möhkəmləndirilməsində mühüm rol oynayır. Qlobal miqyasda bir-biri ilə bağlı çağırışlar - iqlim dəyişikliyi, iqtisadi qeyri-sabitlik və geosiyasi gərginliklər fonunda Asiyada çoxtərəfli əməkdaşlığın gücləndirilməsi xüsusi əhəmiyyət daşıyır. Bu məsələ təkcə regionumuz üçün deyil, bütövlükdə dünya üçün vacibdir.
AZƏRTAC xəbər verir ki, bunu Butan Milli Assambleyasının sədri Lunqten Dorci Bakıda keçirilən Asiya Parlament Assambleyasının 15-ci plenar sessiyasında çıxışı zamanı bildirib.
Lunqten Dorci vurğulayıb ki, bu kimi qlobal problemlər parlamentlərarası əməkdaşlığın gücləndirilməsinin, təcrübə mübadiləsinin aparılmasının zəruriliyini bir daha nümayiş etdirir. Biz birgə addımlar ataraq sülh, sabitlik və xalqlarımızın rifahı naminə fəaliyyət göstərməliyik.
Asiyada çoxtərəfli əməkdaşlığın qlobal sabitlik üçün vacib olduğunu qeyd edən Butan Milli Assambleyasının sədri bildirib ki, “Asiyada çoxtərəfli əməkdaşlığın gücləndirilməsində parlament diplomatiyasının rolu” mövzusuna həsr olunmuş 15-ci plenar iclas konstruktiv dialoq üçün mühüm platformadır. Bu sessiya fikir ayrılıqlarını aradan qaldırır, kollektiv qərar qəbulunu təşviq edir və regional birlik, əməkdaşlıq və sülh uğrunda ortaq öhdəliyimizi bir daha təsdiqləyir.
“Parlament diplomatiyası ənənəvi diplomatik səyləri tamamlayır və gücləndirir. Açıq dialoqu təşviq etməklə, qarşılıqlı inam yaratmaqla və vətəndaşyönümlü həlləri dəstəkləməklə biz iqtisadi tərəqqi, sosial ədalət və ekoloji davamlılıq arasında tarazlığı qorumaq siyasətinin inkişafına töhfə verə bilərik”, – deyə Lunqten Dorci qeyd edib.
Bölmənin digər xəbərləri
