BUXARADA “İPƏK YOLU” MÜŞAVİRƏSİ
Qədim Buxara şəhərində Böyük İpək yolu ilə turizm mövzusunda Ümumdünya Turizm Təşkilatının növbəti müşavirəsi başa çatmışdır. Dünyanın 20-dən artıq ölkəsindən gəlmiş nümayəndələr bir neçə gün ərzində turizm təşkilatlarının qarşısında duran vəzifələr, Böyük İpək yolu ölkələri arasında əlaqələrin genişləndirilməsi, turizm sənayesində xarici investorların cəlb edilməsi və başqa məsələləri müzakirə etmişlər.
Azərbaycandan bu tədbirdə Gənclər, Turizm və İdman Nazirliyi Turizm baş idarəsinin rəisi Natiq Məmmədov və həmin idarənin aparıcı mütəxəssisi Anar Nağıyev iştirak etmişlər.
Natiq Məmmədov öz çıxışında Azərbaycanda turizm sahəsində görülən və görüləcək işlər haqqında məlumat vermiş, növbəti müşavirələrdən birinin Azərbaycanda keçirilməsini təklif etmişdir. Ümumdünya Turizm Təşkilatı baş katibinin müavini David Debilye bu təklifi məmnuniyyətlə qəbul etmişdir.
Natiq Məmmədov AZƏRTAC-ın müxbiri ilə söhbətində demişdir: - İndiyədək Azərbaycan “İpək yolu” beynəlxalq turizm marşrutuna salınmamışdı. Son müşavirədə sübut etdik ki, biz İpək yolunun mərkəzindəyik və Böyük İpək yolu Azərbaycandan keçirsə, necə ola bilər ki, “İpək yolu” turizm marşrutunda Azərbaycanın adı olmasın. Görülən işlər nəticəsində Azərbaycandan keçən iki turizm marşrutu - Türkmənbaşı-Bakı-Şəki-Laqodexi və İran-Bakı-Qırmızı körpü-Gürcüstan marşrutları tanındı.
Sonra bu marşrutda turizm infrastrukturlarının yaradılması istiqamətində fikir mübadiləsi aparıldı.
İclasda Buxara məramnaməsi də qəbul edildi.
Qulu Kəngərli
AzərTac-ın xüsusi müxbiri
Buxara
Bölmənin digər xəbərləri
