CAMAL RƏHİMOV MOSKVADA KEÇİRİLƏN ATÇILIQ İDMANI YARIŞLARINDA YAXŞI NƏTİCƏLƏR GÖSTƏRİR
AZƏRTAC-ın xüsusi müxbiri xəbər verir ki, həmyerlimiz Camal Rəhimov Rusiyada keçirilən konkur üzrə bir neçə yarışda, o cümlədən Rusiya çempionatında iştirak edəcəkdir. Başlıca yarışlar iyunun 21-24-də Moskvanın “Bitsa” atçılıq idmanı klubunda keçiriləcəkdir. 28 ölkənin təmsilçilərinin iştirak edəcəyi yarış 2007-ci il Avropa çempionatının və 2008-ci ilin Olimpiya oyunlarının təsnifat turniridir.
İyunun 17-də Moskva vilayəti qubernatorunun kuboku uğrunda beynəlxalq yarışlar statusunda ilk turnir keçirilmişdir. Camal Rəhimov xeyli lisenziya xalı toplayaraq, 4, 5 və 6-cı nəticə göstərmişdir. Bu və digər beynəlxalq yarışların iştirakçılarının hər biri 2008-ci ilin sonunadək xal toplayacaq və onların yekunlarına görə 2008-ci ilin Olimpiya oyunlarında 3 nəfər iştirak edəcəkdir.
Camal Rəhimov lisenziya xalları uğrunda bu ilin martından mübarizə aparır, Avropada keçirilən yarışlarda fəallıq göstərir. Rusiyada ilk dəfə çıxış edən Camal, gənc olmasına baxmayaraq çox yaxşı nəticələr əldə etmişdir. Onun məşqçisi məşhur braziliyalı Nelson Pesoadır. 19 yaşlı Camal Rəhimov Belçikada yaşayır və Beynəlxalq İqtisadiyyat Kollecinin ikinci kursunda təhsil alır.
Bölmənin digər xəbərləri
