Cavid Qurbanov: Azərbaycan ilə Gürcüstan arasında sərnişin qatarlarının bərpası xalqlarımız üçün çox vacibdir
Tbilisi, 26 may, AZƏRTAC
Bakı-Tbilisi-Bakı sərnişin qatarının 6 illik fasilədən sonra yenidən fəaliyyətə başlaması çox mühüm hadisədir. Azərbaycan Prezidenti İlham Əliyevin və Gürcüstanın Baş naziri İrakli Kobaxidzenin dəstəyi ilə qəbul edilmiş bu qərar xalqlarımız üçün çox vacibdir.
AZƏRTAC xəbər verir ki, bu sözləri Tbilisidə jurnalistlərə açıqlamasında Azərbaycanın rəqəmsal inkişaf və nəqliyyat nazirinin müavini Cavid Qurbanov deyib.
Bu münasibətlə hər kəsi təbrik edən nazir müavini əlavə edib: “Biz bu hadisəni uzun müddətdir - altı ildir gözləyirdik. Bu, həqiqətən də pandemiyadan bəri ilk belə xidmətdir. Qatarlarda şərait çox yüksək səviyyədədir”.
Onun sözlərinə görə, qatar reysinin açılması Gürcüstan və Azərbaycan arasında əlaqələri yaxşılaşdırır və insanların hərəkətini asanlaşdırır: “Bu, xalqlarımız üçün çox vacibdir”.
“Ümid edirik ki, bu cür dinc və müsbət layihələr davam edəcək. Bir daha hər kəsi təbrik edirəm və uğurlar arzulayıram”, – deyə Cavid Qurbanov bildirib.
Xətayi Əzizov
Bölmənin digər xəbərləri
