CEKİ ÇAN ROBERT DE NİROYA OXŞAMAQ İSTƏYİR
AZƏRTAC Röyter Agentliyinə istinadla xəbər verir ki, honqonqlu aktyor belə bir bəyanatla yeni “Rob-B-Hood” filminin təqdimatı mərasimində çıxış etmişdir. Filmin ilk nümayişi Venesiya festivalı çərçivəsində olmuşdur.
Çan mətbuat konfransına toplaşan jurnalistlərə bildirmişdir: “Adamlar məni görəndə adımı çəkərək qışqırmağa və yerlərində atılıb-düşməyə başlayırlar. Niyə Robert de Nironu ayrı cür qarşılayırlar? İstəyirəm ki, məni də belə qarşılasınlar”.
52 yaşlı aktyorun fikrincə, o, “əfsanə” tituluna layiqdir, heç olmasa buna görə ki, savaş filmlərinin onun yaşında ulduzları daha sakit və fiziki baxımdan o qədər də tələbkar olmayan janrlara keçirlər.
Xatırladaq ki, yayın əvvəlində Ceki Çan elan etmişdir ki, öz var-dövlətinin yarısını xeyriyyəçilik tədbirləri üçün vəsiyyət etmək niyyətindədir. Aktyorun dediyinə görə, ölümündən sonra bütün əmlakının əlli faizi onun adını daşıyacaq xeyriyyə fondunun mülkiyyətinə keçəcəkdir.
Bölmənin digər xəbərləri
