Cəmilə Hacıyevanın “Septem” adlı fərdi sərgisi
Bakı, 16 sentyabr, Tatyana İvanayeva, AZƏRTAC
Qədim kəndlərin təkrarolunmaz cazibədarlığı, təbiət və insanın cəzbedici gözəlliyi, peyzajlar, natürmortlar, habelə hamının sevdiyi rənglər; bütün bunları bu yaxınlarda Azərbaycan Mədəniyyət Nazirliyinin nəzdində fəaliyyət göstərən Muzey Mərkəzinin İncəsənət qalereyasında açılan rəssam Cəmilə Hacıyevanın “Septem” adlı fərdi sərgisində görmək olar.
AZƏRTAC xəbər verir ki, gənc rəssamın yaradıcılıq tərcümeyi-halında ilk dəfə keçirilən bu sərgi multisensor formatda təqdim olunub və incəsənət həvəskarları, mədəniyyət xadimləri, təbiətsevərlərin diqqətini cəlb edib. Sərginin ekspozisiyası 40 rəsm əsərindən ibarətdir və onların arasında Şuşa və Cıdır düzünə həsr olunmuş “İndi biz azadıq” tablosu xüsusilə seçilir.
“Septem” rəssamın dünyaya klassik realizmə və impressionizmə əsaslanan baxışıdır. Cəmilə mənəvi və daxili rahatlığı ehtiva edən, estetika çərçivəsini aşan sakit kənd peyzajları yaradır. Onun təmiz və toxunulmamış təbiət cənnəti konsepsiyasından ilhamlanaraq yaratdığı tablolar tamaşaçıları şəhər xaosundan uzaq, harmoniya və təbiətin gözəlliyi ilə vəhdət təşkil edən səyahətə dəvət edir.
Müəllif deyir: “Mən insanı gündəlik həyat qayğılarından azad edən, onu urbanizmin təsirindən ayıran, dünyaya başqa gözlə baxmağa vadar edən və ruhunu təzələyən bir şey yaratmaq istədim.
Beləcə, latıncadan tərcümədə yeddi gün mənasını verən “septem” adlı əsərlər silsiləsi ərsəyə gəldi. Bu, mənim uğurlu rəqəmimdir və “sentyabr” kimi də qəbul olunur. Mən sərgini məhz bu ayda təşkil etməyi planlaşdırdım. Bu silsilənin yaranmasının əsas fəlsəfi ideyası insanları hüzurlu bir aləmə qərq etməkdir. Onlar burada səmimilik görəcək, özlərini evdəki kimi hiss edəcəklər. Hər bir əsərimdə hüzur və sükunətlə süslənmiş bir kənd idilliyası var”.
İncəsənətin sehrli gücünə ürəkdən inanan Cəmilə sadəcə rəsm çəkmir, o, təcrübə yaradır, hissləri oyadır və tamaşaçılarla öz qəlbinin bir hissəsini paylaşır. Onun tabloları sadəcə vizual tamaşa deyil, həm də təbiət aləminə məhəbbət məktubu, onun həyat fəlsəfəsinin ifadəsi və hər kəsə təbiətin qoynunda öz evini tapmaq dəvətidir.
Rəssam qeyd edir: “Hər bir əsərimdə öz enerjim var, çünki hesab edirəm ki, tamaşaçı ilə təmasda olarkən bu enerji onlara da sirayət edir. Dostlarımdan soruşmuşam; mənim əsərlərimə baxanda hansı hisslər keçirirlər? Bir çoxları bildirir ki, onlar rahatlıq tapırlar. Mənim də həyatımda rahatlığın, səmimiliyin olmadığı dövrlər olub. Hətta evdə olanda belə, ev atmosferini hiss etmədiyim vaxtlar. İş o yerə gəlib çatıb ki, avtomobillərin səs-küyündən, zamanın sürətlə axıb getməsindən, şəhər həyatından qurtulub qaçmaq istəmişəm. Məhz həmin vaxt ideal təbiət mənzərələri yaratmaq arzusu meydana gəlib. Rəsmlərimdə əks olunan peyzajlar mənə daxili sakitlik gətirib. Hətta tematik təsvirlərin olmadığı, lakin tükənməz enerji verən əsərlər də var. Məsələn, xüsusi rəsm üslubu olan Mark Rotkonun əsərləri. Mən öz yaradıcılığımı onunla müqayisə etmirəm, amma istəyirəm ki, sükunət, səmimiyyət və hüzur dolu enerji tablolarımın çərçivəsini aşsın”.
Sərgi multisensor konsepsiyaya malikdir və bu, təkcə ekspozisiya ilə vizual tanışlıq deyil, həm də sərgi zalının ətirlə süslənməsi və təbiətə xas səslərin fonunda özəl effekt yaradır.
Yaradıcılıq yolu Cəmilə Hacıyeva üçün həmişə cəzbedici olub. Azərbaycan Dövlət İqtisad Universitetində təhsil alan rəssam Dövlət Rəssamlıq Akademiyasının könüllü dinləyicisi olub. O, burada impressionistlərin yaradıcılığına aludə olub, Elçin Bünyadov kimi rəssam-pedaqoqlardan dərs alıb, 2022-ci ildə isə “Florence Classical Arts Academy”də kurs keçib.
Sərginin digər maraqlı cəhəti hər bir tablonun süni intellektin köməyi ilə hazırlanmış unikal rəqəmsal versiyasının olmasıdır.
Sərgi sentyabrın 17-dək davam edəcək.
Bölmənin digər xəbərləri
