Cənubi Koreya prezidenti hərbçilərə KXDR-in fəaliyyətini izləməyi tapşırıb
Bakı, 27 noyabr, AZƏRTAC
Koreya Respublikasının Prezidenti Yun Sok Yol ölkənin müdafiə naziri və Birləşmiş Qərargah Rəisləri Komitəsinin sədri ilə görüşərək onlara tam döyüş hazırlığını davam etdirmək barədə göstəriş verib.
AZƏRTAC xəbər verir ki, bu barədə Cənubi Koreyanın prezident administrasiyasının rəsmi nümayəndəsi Li Do Un bildirib.
Məlumata görə, Prezident Yun Sok Yol ölkənin hərbi strukturlarının rəhbərlərinə Şimali Koreyanın fəaliyyətini diqqətlə izləməyi və yüksək döyüş hazırlığını davam etdirməyi tapşırıb.
Cənubi Koreya hərbçiləri noyabrın 24-də KXDR-in delimitasiya zonasında mühafizə postlarının bərpası və ağır silahların yerləşdirilməsi üzrə fəaliyyətini qeydə alıb.
Qeyd edək ki, Şimali Koreya noyabrın 21-də kəşfiyyat peykini kosmosa çıxarıb. Koreya Respublikası buna cavab olaraq noyabrın 22-də gərginliyin azaldılması barədə razılaşmanın qismən dayandırıldığını elan edib. Noyabrın 23-də KXDR Müdafiə Nazirliyi razılaşmaya əməl etməyəcəyini və sərhəddə müdafiə tədbirlərinin gücləndiriləcəyini bildirib.
Seulun fikrincə, kəşfiyyat peykinin buraxılması zamanı ballistik raket texnologiyasından istifadə edilməsi BMT Təhlükəsizlik Şurasının qətnamələrini pozur. Pxenyan isə öz növbəsində Koreya Respublikası və ABŞ-ın hərbi fəaliyyəti fonunda kosmik uçuşlar keçirmək hüququna malik olduğunu bəyan edib.
Bölmənin digər xəbərləri
