Cənubi Koreyanın sabiq prezidenti vəzifə səlahiyyətlərindən sui-istifadə etməkdə ittiham olunur
Bakı, 1 may, AZƏRTAC
Cənubi Koreyanın sabiq prezidenti Yun Sok Yol 2024-cü ilin dekabr ayında hərbi vəziyyətlə əlaqədar vəzifə səlahiyyətlərindən sui-istifadə etməkdə ittiham olunur.
AZƏRTAC xəbər verir ki, baş vermiş hadisələri qiyam maddəsi ilə araşdıran prokurorluğun xüsusi qrupu sabiq dövlət başçısının əməllərinin səlahiyyətlərinə uyğunluğunu yoxlayacaq. Bu şübhələr həm də icra zamanı səlahiyyətli orqanlara mane olmaq cəhdi ilə bağlıdır.
Yeni ittihamlar sabiq prezident həbs edilmədən irəli sürülüb. Konstitusiya məhkəməsi aprelin 4-də Yun Sok Yolun prezident toxunulmazlığını ləğv edərək, onun impiçmentini təsdiqləyib. Ona qarşı cinayət təqibi yalnız qiyam və dövlətə xəyanət maddələri ilə mümkündür. Prokurorluq Yun Sok Yolu yanvarın 26-da konstitusiya quruluşuna qarşı qiyamın təşkilində ittiham edir.
Şahidlərin ifadəsinə görə, ötən il dekabrın əvvəlində baş vermiş hadisələr zamanı Yun Sok Yol hərbi vəziyyətin ləğvi ilə bağlı səsverməni pozmaq üçün parlamentə əsgərlər göndərib. Konstitusiya Məhkəməsi bu addımın hakimiyyət bölgüsü prinsipini və ordunun siyasi neytrallığını pozduğu qənaətinə gəlib.
Qeyd edək ki, Cənubi Koreyada növbədənkənar seçkilər iyunun 3-nə təyin olunub.
Bölmənin digər xəbərləri
