Cənubi Qafqaz ölkələri arasında ən az yol qəzası Azərbaycanda qeydə alınıb - STATİSTİKA
Bakı, 23 may, AZƏRTAC
Media Təhlil Mərkəzinin (MTM) Dövlət Statistika Komitəsinin açıqladığı rəsmi rəqəmlər əsasında apardığı təhlilə görə, son 5 ilin I rübü üzrə ən az yol-nəqliyyat hadisəsi 2025-ci ilin yanvar-mart aylarında qeydə alınıb. Daha dəqiq desək, cari ilin I rübündə ölkədə 267 yol-nəqliyyat hadisəsi baş verib və bu say ötən ilin eyni dövrü ilə müqayisədə 17,8 faiz və ya 58 hadisə daha az olub.
AZƏRTAC-ın xəbərinə görə, MTM-in təhlil materialında bildirilir ki, ümumilikdə son 5 ilin statistikası yol-nəqliyyat hadisələrinin sayının daha çox IV rübdə qeydə alındığını göstərir. Buna səbəb mövsümə uyğun olaraq yolların buz bağlaması nəticəsində idarəetmənin çətinləşməsidir.
Qeyd edək ki, 2021-ci ilin əvvəlindən cari ilin mart ayının sonuna kimi ölkədə 6 min 647 yol-nəqliyyat hadisəsi baş verib.
Qəza iştirakçılarına uyğun olaraq avtomobil yollarında baş vermiş yol-nəqliyyat hadisələrinin rüblər üzrə sayına nəzər yetirsək, piyadaların iştirakı ilə baş vermiş yol-nəqliyyat hadisələrinin üstünlük təşkil etdiyini görərik. Rəsmi rəqəmlər də göstərir ki, piyadaların iştirakı ilə baş vermiş qəzaların sayı ilin məhz IV rübündə, yəni qış fəslində ən yüksək həddə çatır.
Aparılan təhlil zamanı məlum olub ki, cari ilin I rübündə piyadaların iştirakı ilə baş vermiş yol-nəqliyyat hadisələrinin sayı ötən ilin eyni dövrü ilə müqayisədə daha çox olub.
Daha dəqiq desək, cari ilin I rübündə nəqliyyat vasitələri və piyadaların iştirakı ilə 125, bir neçə nəqliyyat vasitəsinin iştirakı ilə 90, bir nəqliyyat vasitəsinin iştirakı ilə isə 52 yol-nəqliyyat hadisəsi qeydə alınıb.
Ümumilikdə 2021-ci ilin əvvəlindən cari ilin mart ayının sonuna kimi ölkədə nəqliyyat vasitələri və piyadaların iştirakı ilə 2 min 765, bir neçə nəqliyyat vasitəsinin iştirakı ilə 2 min 440, bir nəqliyyat vasitəsinin iştirakı ilə isə 1441 yol-nəqliyyat hadisəsi baş verib.
Son 5 ildə yol-nəqliyyat hadisələri nəticəsində yaralanan və həlak olan şəxslərin sayına baxsaq, yalnız 2024-cü ilin IV rübündə həlak olanların sayı yaralananların sayından çox olub.
Ortalama olaraq hər rübdə 90 günün olduğunu nəzərə alsaq deyə bilərik ki, gün ərzində ölkəmizdə ən azı bir nəfər yol-nəqliyyat hadisəsi nəticəsində dünyasını dəyişir.
Yol-nəqliyyat hadisələri nəticəsində həlak olan şəxslərin sayı ilə bağlı ən yüksək göstərici 2022-ci ilin III rübündə qeydə alınıb və həmin dövrdə bu səbəbdən 263 nəfər dünyasını dəyişib.
Yaralananlarla bağlı ən mənfi göstərici 409 nəfər olmaqla 2021-ci ilin IV rübünə təsadüf edib.
Ümumilikdə 2021-ci ilin əvvəlindən cari ilin mart ayının sonuna kimi ölkədə baş vermiş yol-nəqliyyat hadisələri nəticəsində 5 min 616 nəfər yaralanıb, 3 min 315 nəfər isə həlak olub.
Cari ilin I rübündə isə yol-nəqliyyat hadisələri nəticəsində 223 şəxs yaralanıb, 149 şəxs isə dünyasını dəyişib.
Cənubi Qafqaz ölkələrinin Dövlət Statistika Komitələrinin rəsmi rəqəmləri əsasında aparılan təhlilə əsasən, 2021-2024-cü illəri əhatə edən 4 il ərzində ən az yol-nəqliyyat hadisəsi Azərbaycanda qeydə alınıb. Bu dövr ərzində Azərbaycanda 6 min 380, Ermənistanda 17 min 839, Gürcüstanda isə 17 min 198 yol-nəqliyyat hadisəsi baş verib.
4 il ərzində qəzalar nəticəsində Azərbaycanda 3 min 166 nəfər, Ermənistanda 1400 nəfər, Gürcüstanda isə 1765 nəfər dünyasını dəyişib.
Bölmənin digər xəbərləri
