Cənubi Qafqazda yeni geosiyasi reallıq: Hərbi gücdən iqtisadi rəqabətə - RƏY
Bakı, 2 sentyabr, AZƏRTAC
Cənubi Qafqazda münaqişələr dövrü qapandıqdan sonra region tamamilə yeni bir geosiyasi mərhələyə qədəm qoyub. Artıq dağıdıcı hərbi güc nümayişi öz yerini rasional siyasi və iqtisadi rəqabətə verir. Bəzi analitiklər bu dinamik dəyişikliyi riskli hesab etsələr də, əslində bu, regionun dayanıqlı gələcəyi üçün son dərəcə müsbət və tarixi bir irəliləyişdir.
Bu sözləri AZƏRTAC-a açıqlamasında siyasi şərhçi Araz Balayev deyib.
Siyasi şərhçi qeyd edib ki, əvvəllər bütün beynəlxalq platformalarda bir-birinə kəskin şəkildə qarşı çıxan tərəflərin indi ortaq regional mövqe sərgiləməsi, hətta yeri gəldikdə bir-birinin lehinə səs verməsi bu dəyişikliyin ən bariz nümunəsidir. Maliyyə resurslarının böyük bir hissəsini hərbi üstünlük əldə etmək üçün silahlanmaya sərf edən ölkələr indi iqtisadiyyat, logistika və regional layihələr üzrə rəqabət aparır. Bu yeni konyunkturadan çəkinmək yox, onun yaratdığı strateji dividendlərdən maksimum yararlanmaq lazımdır. Elə bu günlərdə Qırğızıstanın paytaxtı Bişkekdə keçirilən Şanxay Əməkdaşlıq Təşkilatının “ŞƏT plyus” formatındakı sammiti Azərbaycanın bu yeni dövrün imkanlarından necə çevik və düzgün istifadə etdiyini aydın göstərir.
“Prezident İlham Əliyevin tədbir çərçivəsində keçirdiyi ikitərəfli görüşlər arasında İran İslam Respublikasının Prezidenti Məsud Pezeşkian və Hindistanın Baş naziri Narendra Modi ilə müzakirələri xüsusilə diqqət çəkdi. Hər iki ölkənin lideri Azərbaycan Prezidenti ilə səmimi və konstruktiv dialoq apardı, ikitərəfli əlaqələri inkişaf etdirmək iradəsini ortaya qoyur. Həm İran, həm də Hindistan Azərbaycanın formalaşdırdığı regional nəqliyyat-kommunikasiya imkanlarından və qlobal tranzit dəhlizlərindən faydalanmaqda maraqlıdır. Bu müsbət proses sadəcə birtərəfli xarakter daşımır. Ermənistan tərəfi də öz növbəsində regionun digər gücləri – Azərbaycanın dost və qardaş hesab etdiyi Türkiyə və Pakistanla yeni təmaslar qurmaq, münasibətləri normallaşdırmaq üçün addımlar atır. Paralel olaraq, Azərbaycan və Ermənistan liderləri birbaşa dialoq üçün yaranan hər bir fürsəti yüksək qiymətləndirirlər. Bu baxımdan Bişkekdə baş tutan görüşü artıq yeni dövrün ənənəsi adlandıra bilərik. Nə vasitəçilər var, nə də tərəflərin aqressiyası. Azərbaycan Prezidenti və Ermənistan Baş naziri regionda sülhü daha da möhkəmləndirmək, nəqliyyat-logistika dəhlizlərini tezliklə açmaq və qarşılıqlı ticarət əlaqələrini canlandırmaq ətrafında birbaşa danışıqlar aparırlar”, - deyə o bildirib.
Bölmənin digər xəbərləri
