Ceyhun Məmmədov: Bizim uroginekoloqlara ehtiyacımız var
Bakı, 27 noyabr, AZƏRTAC
"2020-ci ildə TƏBİB-in tabeliyində olan tibb müəssisələrində 4 mindən çox uşaq vaxtından əvvəl doğulub. Bu rəqəmi azaltmaq bizim üçün çox vacibdir".
AZƏRTAC xəbər verir ki, bunu Dövlət Gömrük Komitəsi Tibbi Xidmət İdarəsinin rəisi Ceyhun Məmmədov Ümummilli Lider Heydər Əliyevin 100 illik yubileyinə həsr edilmiş "Ana və uşaq sağlamlığı: Mövcud problemlərə müasir baxış" beynəlxalq elmi konqresinin açılış mərasimində deyib.
C.Məmmədov bildirib ki, vaxtından əvvəl doğuşlarla mübarizədə bir sıra tövsiyələr, o cümlədən Ümumdünya Səhiyyə Təşkilatının tövsiyələri var. Bunlardan biri 1951-ci ildən mövcud olan, köhnə üsul adlandırılan servikal tikiş əməliyyatıdır. Son dövrlərdə aparılan tədqiqatlar nəticəsində həmin üsul yeni nəfəs qazanıb.
"Günümüzün digər reallığı əhalinin yaşlanması, onun tərkibində yaşlı və ahıl insanların payının artmasıdır. Bu da səhiyyə sistemi qarşısında yeni tələblər qoyur. Qadınlar yaşlandıqca uroginekoloji problemlər, sidikqaçırma və kiçik çanaq orqanlarının prolapsı kimi xəstəliklərlə daha çox üzləşirlər. Ənənəvi olaraq həmin xəstəliklərlə uroloqlar məşğul olurlar. Lakin sübut olunub ki, ən yaxşı yanaşma həm urologiya, həm də ginekologiya sahəsində təcrübə və biliyi olan mütəxəssislərə müraciət etməkdir. Bizim belə mütəxəssislərə - uroginekoloqlara ehtiyacımız var”, - deyə C.Məmmədov bildirib.
Bölmənin digər xəbərləri
