Çarlz Conson: Bakıda məni çox isti qarşıladılar
Bakı, 24 iyun, AZƏRTAC
Bakıda məni çox isti qarşıladılar.
AZƏRTAC xəbər verir ki, bu sözləri Bakıda keçiriləcək UFC turnirində iştirak edəcək amerikalı döyüşçü Çarlz Conson mətbuat konfransında deyib. O, son döyüşlərində tez-tez Qazaxıstan təmsilçiləri ilə üz-üzə gəldiyini bildirib: “Son qarşılaşmalarımın əksəriyyəti qazaxıstanlı döyüşçülərə qarşı olub. Hətta bir dəfə azarkeşlər mənə zarafatla dedilər ki, bizim idmançıları məğlub etmə. Karyeram ərzində boksla yanaşı, muay tayla da məşğul olmuşam”.
Çarlz Conson Bakı ilə bağlı xoş təəssüratlarını da bölüşüb: “Şəhəriniz çox gözəldir. Təmizlik yüksək səviyyədədir. İnsanlar isə olduqca mehriban və qonaqpərvərdirlər”.
Amerikalı döyüşçü Azərbaycan təmsilçisi Rafael Fizievlə yaxın münasibətlərinin olduğunu da vurğulayıb: “Rafaellə çox yaxşı münasibətimiz var. Onunla 2020-ci ildə tanış olmuşam. Tailandda muay tay üzrə məşqlər zamanı mənim məşqçilərimdən biri olub”.
Qeyd edək ki, Çarlz Conson UFC turnirində Qazaxıstan təmsilçisi Asu Almabayevlə qarşılaşacaq.
Bölmənin digər xəbərləri
