Çin ABŞ rəsmilərinə sanksiyalar tətbiq etməyə başlayıb
Pekin, 18 yanvar, AZƏRTAC
Rəsmi Pekin Honkonq və Tayvan məsələsi ilə bağlı pis davranışlarına görə ABŞ administrasiyasının bəzi vəzifəli şəxslərinə qarşı cavab sanksiyaları tətbiq etməyi qərara alıb.
AZƏRTAC xəbər verir ki, bu barədə Çin Xarici İşlər Nazirliyinin rəsmisi Hua Çunyin yanvarın 18-də keçirdiyi mətbuat konfransında bildirib. Rəsmi Pekin bu addımı ABŞ-ın Honkonq məsələsində Çin məmurlarına qarşı yeni sanksiyalar tətbiq etməsi və Çinin daxili işlərinə açıq müdaxilə kimi qiymətləndirilən Tayvan regionu ilə fəaliyyətləri fonunda atıb.
Çin XİN-in nümayəndəsi bildirib ki, sanksiyalar Honkonq məsələsi ilə əlaqədar ABŞ administrasiyası rəsmiləri ilə yanaşı, Konqresin bəzi üzvlərini və qeyri-hökumət təşkilatlarının məsul işçilərini, onların ailə üzvləri də əhatə edir. Çin tərəfi sanksiyaların nədən ibarət olduğunu açıqlamayıb.
Hua Çunyin rəsmi Pekinin Birləşmiş Ştatların Çinin daxili işlərinə və məhkəmə suverenliyinə mənasız müdaxiləsini pislədiyini bəyan edib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
