Cin hakimiyyəti ailələrin üç uşaq sahibi olmasına icazə verib
Bakı, 31 may, AZƏRTAC
Çinin hakimiyyət orqanları ailələrin üç uşaq sahib olmasına icazə verən qərar qəbul edib.
AZƏRTAC Sinxua informasiya agentliyinə istinadla xəbər verir ki, bu barədə qərar Çin Kommunist Partiyası Siyasi bürosunun iclasında qəbul olunub. Qərarın nə vaxt qüvvəyə minəcəyi dəqiqləşdirilməyib.
1970-ci illərin ortalarında Çində doğumun məhdudlaşdırılması istiqamətində sərt tədbirlər görülməyə başlanılmışdı. O zaman bəzi istisnalar olmaqla, ailələrə yalnız bir uşağa sahiblənmə icazəsi verilirdi. Qaydanı pozan valideynlər böyük cərimələrə məruz qalırdı. Onlar, həmçinin dövlət xidmətindən kənarlaşdırılır və Kommunist partiyasının sıralarından xaric edilirdi.
2016-cı il yanvarın 1-dən isə ölkədə çinli ailələrin iki uşağa sahib olmasına icazə verən qanun qüvvəyə minib.
Qeyd edək ki, mayın 12-də Çində hər on ildən bir keçirilən əhalinin siyahıya alınması prosesi barədə məlumatlar dərc olunub. Sənədə əsasən, 2021-ci ilin əvvəlində ölkədə 1 milyard 411 milyon nəfər yaşayır.
Bölmənin digər xəbərləri
