CƏMİYYƏT
CİNAYƏTKARLAR LAYİQLİ CƏZALARINI ALDILAR
Ötən ilin yayında respublikamızın Zaqatala-Balakən bölgəsində mütəşəkkil silahlı dəstə tərəfindən törədilmiş cinayətlərdə ittiham olunan 23 nəfərin Mingəçevirdə məhkəmə prosesi başa çatmışdır. Ağır Cinayətlərə dair İşlər üzrə Azərbaycan Respublikası Məhkəməsinin hakimi Vəkıl Şükürovun sədrliyi ilə keçirilən məhkəmə prosesində təkzibolunmaz faktlarla, müttəhim və şahid ifadələri ilə sübut olunmuşdur ki, 3 nəfərin ölümü, 7 nəfərin ağır yaralanması, dövlət mülkiyyətinin və şəxsi mülkiyyətin məhv edilməsi ilə müşayiət olunan hərəkətlərin törədilməsindən başlıca məqsəd respublikamızda ictimai-siyasi sabitliyi pozmaq, bu bölgədə etnik münaqişə ocağı yaratmaq, separatizm meyillərini qızışdırmaq olmuşdur. Cinayətkar dəstənin ayrı-ayrı üzvləri bu məqsədlə Yerevanda və Rusiyanın müxtəlif şəhərlərində Ermənistan xüsusi xidmət orqanlarının nümayəndələri ilə görüşmüş, onlardan gizli təlimat, pul, silah, döyüş sursatı almışlar.
Qanunsuz silahlı qrupun əsas rəhbərlərindən olan Emin Mollayev, İlham və Emin Baqqayev qardaşları ömürlük, Nəcməddin Məmmədov və Şaban Buşdiyev 15 il, Fazil Davudov 13 il, Soltan Qazıxanov 11 il, Qurban Həsənov 10 il, digərləri isə 7-8 il müddətinə azadlıqdan məhrum edilmişlər. İstintaq prosesində 16 nəfər barədə axtarış elan olunmuşdur.