Cümhuriyyətimizin bir illik fəaliyyətindən bəhs edən məcmuə latın qrafikasında
Bakı, 13 oktyabr (AZƏRTAC). Bu günlərdə çapdan çıxmış “İstiqlal 1918-28 Mayıs-1919” adlı məcmuə Azərbaycan Xalq Cümhuriyyətinin bir illik fəaliyyətindən bəhs edir.AZƏRTAC xəbər verir ki, nəfis şəkildə hazırlanmış nəşrin təşəbbüskarı və ərəb əlifbasından latın qrafikasına çevirəni Bakı Dövlət Universitetinin professoru Şirməmməd Hüseynovdur.
Kitabın üz qabığında professor Ş.Hüseynovun oxuculara ünvanlanan bu fikirləri yer alıb: “Məcmuə çoxminillik dövlətçilik tariximizdə ilk dəfə “Azərbaycan” adlı dövlətimizin bir yaşının tamam olması münasibətilə 1919-cu il mayın 28-də işıq üzü görmüşdür. Cəmi 4 ildən sonra Azərbaycan Xalq Cümhuriyyətinin 100 illik yubileyini müstəqil cümhuriyyətimizdə bayram edəcəyik. Bu məcmuəni həmin yubileyə hazırlığın ilk töhfəsi hesab edin!”
Kitabdakı “Azərbaycan Cümhuriyyəti”, “Azərbaycan paytaxtı”, “Azərbaycan türklərinin musiqisi haqqında”, “Azərbaycan” və digər başlıqlı yazılarda Şərqin ilk demokratik respublikası olan Azərbaycan Xalq Cümhuriyyətinin qurucuları, onların fəaliyyəti, ölkəmizin coğrafi mövqeyi, tarixi keçmişi, mədəni irsi, ədəbiyyatı, musiqi xəzinəsi haqqında dolğun məlumatlar öz əksini tapıb. Həmçinin burada istiqlal şairləri Əhməd Cavadın və Əli Yusifin şeirləri də yer alıb.
Bu dəyərli məcmuədə Azərbaycan Demokratik Respublikasının qurucularının fotoşəkilləri, ölkəmizin tarixi binalarının keçmiş görüntüləri də verilib.
Məcmuədə yer alan materiallar ərəb əlifbasındakı orijinal variantı ilə birgə çap olunub.
Şübhə yoxdur ki, bu dəyərli məcmuə Xalq Cümhuriyyətinin bir illik fəaliyyətini daha yaxından öyrənmək istəyən hər bir Azərbaycan vətəndaşının böyük marağına səbəb olacaq.
Bölmənin digər xəbərləri
