Dağıstanda 760-dan çox ev su altında qalıb
Moskva, 11 aprel, AZƏRTAC
Baş verən güclü daşqınlardan sonra Dağıstanın doqquz yaşayış məntəqəsində 760-dan çox yaşayış binası su altında qalıb.
AZƏRTAC xəbər verir ki, bu barədə Rusiya Fövqəladə Hallar Nazirliyinin mətbuat xidməti bildirib.
Bölgənin beş bələdiyyəsində 762 yaşayış binası, 812 bağ sahəsi və 76 yol hissəsi su altında qalıb. Hazırda 175 uşaq da daxil olmaqla 524 nəfər 16 müvəqqəti yerləşdirmə mərkəzində yerləşdirilib.
Nazirliyin məlumatına görə, Fövqəladə Hallar Nazirliyinin rəhbəri Aleksandr Kurenkovun tapşırığı ilə Don Xilasetmə Mərkəzindən 100 mütəxəssis və 30 ədəd texnika Dərbənd rayonuna göndərilib. Ümumilikdə, şiddətli hava şəraitinin nəticələrinin aradan qaldırılmasına aviasiya da daxil olmaqla 3800-dən çox mütəxəssis və mindən çox texnika cəlb olunub.
Martın sonu və aprelin əvvəllərində yağan güclü yağışlar genişmiqyaslı daşqınlara səbəb oldu. Mahaçqala, Xasavyurt, Buynaksk da daxil olmaqla bir neçə şəhər və rayonda, eləcə də Dərbənddə və respublikanın digər rayonlarında federal səviyyəli fövqəladə vəziyyət elan edilib.
Su səviyyəsinin yüksəlməsi Dərbənd rayonundakı federal magistral yolun bəzi hissələrində daşqınlara səbəb olub. Gejux su anbarında bəndi su yuyub aparıb, nəticədə 4 mindən çox insan təxliyə edilib. Son məlumatlara görə, daşqın nəticəsində altı nəfər ölüb, 6200-dən çox insan zərər çəkib.
Bölmənin digər xəbərləri
