DAŞKƏSƏNİN XOŞBULAQ YAYLAĞINDA OLİMPİYA İDMAN KOMPLEKSİNİN TƏMƏLİ QOYULMUŞDUR
AZƏRTAC xəbər verir ki, noyabrın 17-də Daşkəsən rayonunun Xoşbulaq yaylağında Olimpiya İdman Kompleksinin təməli qoyulmuşdur.
Respublikanın Gənclər və İdman naziri Azad Rəhimovun iştirakı ilə keçirilən təməlqoyma mərasiminin iştirakçıları əvvəlcə ümummilli liderimiz Heydər Əliyevin rayon mərkəzində ucaldılmış abidəsini ziyarət etmiş, dahi şəxsiyyətin həyat və fəaliyyətini əks etdirən muzeyə baxmışlar.
Sonra əsaslı təmir edilmiş rayon uşaq-gənclər idman məktəbinin açılışı olmuşdur. İştirakçılar məktəbi gəzmiş, burada yaradılmış şəraitlə yaxından tanış olmuşlar.
Rayon ictimaiyyəti nümayəndələrinin iştirakı ilə Xoşbulaq yaylağında keçirilən təməlqoyma mərasimində Daşkəsən Rayon İcra Hakimiyyətinin başçısı Tahir Kərimov əlamətdar hadisə münasibətilə sakinləri təbrik etmiş, təməli ulu öndər Heydər Əliyev tərəfindən qoyulmuş və Prezident İlham Əliyev tərəfindən daha da inkişaf etdirilən iqtisadiyyatımızın insanların rifahının yüksəlməsinə bəxş etdiyi töhfələrdən danışmışdır. Dəniz səviyyəsindən 1700 metr yüksəklikdə yerləşən Xoşbulaqda belə bir idman kompleksinin tikintisini ölkə rəhbərinin daşkəsənlilərə, xüsusilə gənclərə diqqət və qayğısının təzahürü kimi dəyərləndirmişdir.
Nazir Azad Rəhimov Respublika Prezidenti İlham Əliyevin göstərişi ilə ölkədə inşa edilən komplekslərin Azərbaycan idmanına bəxş etdiyi töhfələrdən danışmışdır. Qeyd etmişdir ki, son 4 ildə respublikada 19 Olimpiya İdman Kompleksi istifadəyə verilmişdir. Hazırda 17 kompleksdə inşaat işləri uğurla davam etdirilir. Daşkəsən Olimpiya İdman Kompleksində də lazım olan bütün şərait nəzərdə tutulmuşdur. 3,5 hektar sahədə yerləşəcək kompleksdə üzgüçülük hovuzu, futbol, voleybol, basketbol, tennis meydançaları, idmançıların istirahət və soyunub-geyinmə otaqları, digər yardımçı binalar inşa ediləcəkdir.
Respublika idmançılarının mötəbər yarışlara hazırlaşmasında, onların təlim-məşq prosesini səfalı Xoşbulaq yaylağında keçməsinin böyük səmərə verəcəyinə əminlik ifadə edən natiq demişdir ki, bölgələrdə idman komplekslərinin tikintisi bundan sonra da davam etdiriləcəkdir. Nəzərdə tutulmuşdur ki, gələn il Şirvanda, Göygöldə, Yardımlıda, ümumiyyətlə, 9 rayonda Olimpiya İdman Kompleksi istifadəyə veriləcəkdir. Ən geniş inşaat işləri isə Mingəçevirdəki “Kür” idman bazasında aparılacaqdır.
Sonra yeni kompleksin təməli qoyulmuşdur.
Mərasimdən sonra nazir Azad Rəhimov rayonun idmançı gəncləri ilə görüşüb söhbət etmiş, onlarla xatirə şəkli çəkdirmişdir.
######
Bölmənin digər xəbərləri
