Davos Forumu Azərbaycanın artan siyasi çəkisini nümayiş etdirdi
Bakı, 23 yanvar, AZƏRTAC
Bu gün dünya mətbuatının əsas müzakirə mövzularından biri İsveçrənin Davos şəhərində keçirilən Dünya İqtisadi Forumunun sayca 53-cü toplantısıdır. Hər il ənənəvi keçirilən bu tədbir iştirakçı dövlətlərin malik olduqları iqtisadi imkanların təqdimatında əhəmiyyətli rol oynayır. “Parçalanmış dünyada əməkdaşlıq” mövzusunda keçirilən builki Forumda dünyanın 130-dan çox ölkəsindən ümumilikdə 2700-dən artıq nüfuzlu şəxs, o cümlədən 52 dövlət və hökumət başçısı iştirak edib. Hər zaman qeyd edildiyi kimi, keçirilən hər beynəlxalq əhəmiyyətli tədbir həm məkan, həm də müzakirəyə çıxarılan mövzunun aktuallığı, eyni zamanda, iştirakçıların say tərkibi baxımından xüsusi diqqət çəkir. Qütbləşmə prosesinin daha da dərinləşdiyi hazırkı dövrdə dövlətlər arasında əməkdaşlıq əlaqələrinin coğrafiyasının daha da genişləndirilməsi əsas çağırışlar sırasındadır. Dünya İqtisadi Forumunun tarixinə, onun dünya və ölkəmiz üçün əhəmiyyətinə nəzər saldıqda hər il tədbirin günümüzün ən aktual məsələlərinə həsr olunduğunu, həmçinin iştirakçıların sayının daha da artdığını görərik. Qlobal problemlərin müzakirə olunduğu və dünyanın iqtisadi həyatında önəmli qərarların verildiyi Dünya İqtisadi Forumuna dövlətimizin başçısı İlham Əliyevin növbəti dəfə dəvət olunması, Forum çərçivəsində keçirdiyi çoxsaylı görüşlər, həmçinin ölkə Prezidentinin Çinin CGTN (China Global Television Network) televiziya kanalına müsahibəsi həm ölkəmizin, həm də Prezident İlham Əliyevin beynəlxalq aləmdə nüfuzunun göstəricisi oldu. Belə ki, Forum çərçivəsində Azərbaycan Prezidenti İlham Əliyev 8 qlobal şirkətin rəhbər şəxsləri, Avropa Yenidənqurma və İnkişaf Bankının birinci vitse-prezidenti, BMT-nin Məskunlaşma proqramının icraçı direktoru ilə görüşdü. Bununla yanaşı, Azərbaycan Prezidenti Latviya, Litva, Xorvatiya, Monteneqro, Niderland dövlət və hökumət başçıları ilə də görüşüb.
Bu fikirləri AZƏRTAC-a Milli Məclisin deputatı Malik Həsənov bildirib.
Bu görüşlərdə Prezident İlham Əliyevin regional vəziyyət haqqında ətraflı məlumat verdiyini diqqətə çatdıran Malik Həsənov deyib: “Xüsusilə Ermənistan və Azərbaycan arasında münasibətlərin normallaşdırılması, bu məsələdə Ermənistanın destruktiv mövqeyi, Azərbaycanla sülh müqaviləsinin imzalanmasına mane olan müxtəlif bəhanələri və danışıqlar prosesindən yayınmaq cəhdləri geniş müzakirə mövzusu oldu. Azərbaycanın sülh gündəliyinin və yeni əməkdaşlıq formatlarının müəllifi kimi möhkəmlənən mövqeyi diqqətdən kənarda qalmır. Təbii ki, bu, xarici siyasətimizin prinsiplərinin dəyişməz olmasının, həmçinin ədalətin və beynəlxalq hüququn norma və prinsiplərinin öndə dayanmasının göstəricisidir”.
Deputat qeyd edib ki, Prezident İlham Əliyev keçirdiyi bütün görüşlərdə Laçın yolu ətrafında yaranmış vəziyyət, Rusiya sülhməramlılarının müvəqqəti yerləşdiyi Azərbaycan ərazilərində təbii sərvətlərimizin talan edilməsinə qarşı etiraz aksiyasından danışıb. Bu aksiyanın legitim əsaslara söykəndiyini qeyd edən dövlətimizin başçısı Rusiya sülhməramlılarının müvəqqəti nəzarətində olan Azərbaycan ərazilərində kriminal qruplaşmaların mövcudluğunu, Laçın yolundan uzun müddət minaların daşınması üçün istifadə edildiyini diqqətə çatdırıb.
“Məlumdur ki, Ermənistan və onun havadarları beynəlxalq arenada Azərbaycana qarşı hansısa sanksiyaların tətbiq edilməsi iddiaları, ölkəmizin beynəlxalq aləmdən təcrid edilməsi ilə bağlı tezislərlə çıxış edirlər. Amma Davos Dünya İqtisadi Forumu bu iddiaların həqiqətəuyğun olmadığını və Azərbaycanla müxtəlif sferalarda əməkdaşlıq etmək istəyən tərəflərin sayının gündən-günə artdığını növbəti dəfə nümayiş etdirdi. Azərbaycanın iqtisadi tərəfdaşlarının sayı artır. Ölkəmizin iştirakçısı olduğu enerji layihələrinin uğurlu sonluqla başa çatması Azərbaycanın dünyanın enerji təhlükəsizliyinin təminatında rolunu daha da artırır. Bu gün böyük inamla qeyd edirik ki, Azərbaycan neft, qaz, eyni zamanda, elektrik enerjisi ixracatçısıdır. Hazırkı dövrdə əsas hədəf bərpaolunan enerji mənbələrinə investisiyaların yatırılmasıdır. Azərbaycanda sabitliyin və normal biznes mühitinin mövcudluğu investisiya cəlbediciliyini qorumasında öz sözünü deyir”, - deyə deputat vurğulayıb.
Malik Həsənov bildirib ki, builki Davos Forumunda Prezident İlham Əliyevlə görüşmək arzusunda olan tərəfdaşların sayı, təmsil etdikləri coğrafiya Azərbaycanın artan siyasi çəkisinin göstəricisidir. Azərbaycan daim müstəqil siyasəti ilə dünyanın diqqətində olub. Postmünaqişə dövründə Azərbaycana artan diqqət və maraq göz önündədir. Reallıq budur ki, Ermənistan təcrid olunmuş vəziyyətdədir. İki ildən artıqdır Azərbaycan Ermənistana sülh müqaviləsinin imzalanması təklifini etsə də qarşı tərəf konkret addım atmaq barədə hələ də düşünmür. Dünya gücləri Azərbaycanın bu təklifini dəstəkləməklə yanaşı, bu istiqamətdə səylərini əsirgəməyəcəklərini bildirirlər.
Bölmənin digər xəbərləri
