Davos Forumu ölkəmizlə yeni münasibətlər qurmaq istəyən tərəfdaşlar üçün fürsətlər yaradır
Bakı, 18 yanvar, AZƏRTAC
İsveçrənin Davos şəhərində keçirilən Dünya İqtisadi Forumu dövlət başçılarının, nüfuzlu iş adamlarının, görkəmli elm xadimlərinin iştirakı ilə ölkələrin öz imkanlarını təqdim etməsi baxımından əlverişli platformadır. Prezident İlham Əliyevin də qoşulduğu builki Forumda dünyanın 130 ölkəsindən 2700-dən çox iş adamı, elm xadimi və 52 ölkədən dövlət və hökumət başçıları iştirak edirlər.
Azərbaycan Dünya İqtisadi Forumuna ilk dəfə Ulu Öndər Heydər Əliyevin təşəbbüsü və iştirakı ilə qatılıb. Uzun müddətdir ki, Azərbaycan bu forumda aktiv dövlət və tərəfdaş kimi iştirak edir, eyni zamanda, bir çox qlobal həllər üzrə müzakirələrə qoşulur. Dövlətimizin başçısı Forumda mütəmadi olaraq dünyanı narahat edən qlobal səviyyəli mühüm məsələlərin həlli üzrə təşkil olunmuş panellərdə iştirak edir, ideyalarını səsləndirir və öz töhfəsini verir.
Bu fikirləri AZƏRTAC-a açıqlamasında Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, Azərbaycan Gənc Alim, Doktorant və Magistrlər Cəmiyyətinin sədri İlqar Orucov söyləyib.
İlqar Orucovun sözlərinə görə, bu Forumun vacib məqamlarından biri ondan ibarətdir ki, burada Azərbaycanın tam iqtisadi və siyasi imkanları nümayiş etdirilir. Əminliklə deyə bilərik ki, Dünya İqtisadi Forumunun bu toplantısında da Azərbaycan qlobal məsələlərin həlli naminə yeni imkanlarını ortaya qoyacaq. Bu məqsədlə dövlətimizin başçısının Davosda yüksək səviyyəli böyük iş adamları və biznes rəhbərləri, həmçinin konfrans nümayəndələri ilə görüşlərinin keçirilməsi planlaşdırılır. Təbii ki, Prezident İlham Əliyev Forumun dünya siyasətinə, beynəlxalq və digər iqtisadi münasibətlərə çox ciddi təsirə malik olmasından istifadə edərək ölkəmizin həyata keçirdiyi nəqliyyat və enerji layihələri barədə, Avropa üçün enerji təhlükəsizliyini təmin edə biləcək etibarlı və dayanıqlı tərəfdaş kimi dünya liderləri ilə müzakirələr aparır, Azərbaycan həqiqətlərini dünya ictimaiyyətinə çatdırır. Bu səbəbdəndir ki, belə platformalarda Azərbaycana olan marağın ildən-ilə yüksəlməsinin şahidi oluruq.
O bildirib ki, Azərbaycanın böyük Qələbəsindən sonra bölgədə yaranmış yeni iqtisadi və siyasi münasibətlər fonunda ölkəmizlə əməkdaşlıq etmək istəyən dövlətlər üçün imkanlar yaranıb: “Dünyadakı böyük şirkətlər işğaldan azad olunmuş ərazilərə sərmayələrin qoyulması baxımından Azərbaycanla əməkdaşlıqda maraqlıdır. Çünki həmin şirkətlər Azərbaycanın timsalında etibarlı tərəfdaş və yeni imkanlar əldə edəcəklər. Təbii ki, bu münasibətlər, keçirilən görüşlər, baş tutan danışıqlar Azərbaycanın milli maraqlarına xidmət etməklə yanaşı, ölkəmizlə yeni iqtisadi münasibətlər qurmaq istəyən tərəfdaşlar fürsətlər yaradır”.
İlqar Orucov əlavə edib ki, Azərbaycan iqtisadi və siyasi münasibətlərə hər zaman açıqdır. Əlbəttə ki, dövlətimizin başçısının bu istiqamətdə həyata keçirdiyi siyasət Azərbaycanın maraqlarını təmin etmək və etibarlı tərəfdaş kimi təqdim etmək baxımından ölkəmizə yeniliklər gətirəcək.
Bölmənin digər xəbərləri
