Deputat: 27 ildən sonra biz Kəlbəcərdə qətlə yetirilən günahsız soydaşlarımızın qisasını aldıq
Bakı, 2 aprel, AZƏRTAC
Biz 27 ildən sonra ilk dəfədir Kəlbəcərin işğalı gününü qeyd etmirik. Lakin biz bu acı tarixi bu il də unutmamışıq və bundan sonra da unutmayacağıq. Məhz 27 il sonra biz şəhidlərimizin, Kəlbəcərdə qətlə yetirilən günahsız soydaşlarımızın qisasını alaraq qürurla deyirik : “Kəlbəcər bizdədir, Kəlbəcər Azərbaycandır!”.
Bunu AZƏRTAC-a açıqlamasında Milli Məclisin deputatı Cavid Osmanov deyib.
C.Osmanov qeyd edib ki, Azərbaycan müstəqilliyinin ilk illərində ağrılı-acılı çox günlər yaşayıb. Bunun əsas səbəblərindən biri də naşı, səriştəsiz, təsadüfi adamların ölkəyə rəhbərlik etməsi olub. 1992-1993-cü illərdə ölkəyə AXC-Müsavat cütlüyünün rəhbərlik etməsi isə Azərbaycan tarixində qara ləkə olaraq qalıb. Yarıtmaz siyasətləri, başlarının hakimiyyət davasına qarışması ölkəmiz üçün ağır fəsadlara səbəb oldu. Hisslərə qapılaraq aparılan xarici siyasət kursu isə Azərbaycan üçün əlavə problemlər yaradır, qonşu ölkələrlə münasibətlərin tamamilə korlanmasına gətirib çıxarırdı. Belə bir vaxtda ölkəmizə qarşı ərazi iddiaları irəli sürən Ermənistan yaranmış fürsətdən istifadə edərək, sərhəd rayonlarda təxribatlar törədir və öz məqsədlərinə nail olmağa çalışırdılar. Kəlbəcərin ermənilər tərəfindən işğal edilməsi isə digər rayonların işğal olunması üçün açar rolunu oynayırdı.
Deputat diqqətə çatdırıb ki, paytaxt Bakıda AXC-Müsavat cütlüyünün başı hərc-mərcliyə, vəzifə bölgüsünə qarışdığı üçün Qarabağ və ətraf rayonlar yaddan çıxmış, tamamilə müdafiəsiz qalmışdı. Kəlbəcərin işğal edilməsi AXC-Müsavat hakimiyyətinin Azərbaycan xalqına xəyanəti nəticəsində baş verdi. Ölkənin və xalqın təhlükəsizliyini təmin edə bilməyən AXC-Müsavat hakimiyyəti ölkədə xaos, anarxiya, özbaşınalıq yaratmış, ordu quruculuğu məhv edilmiş və hakimiyyətdə daha da möhkəmlənmək məqsədilə ayrı-ayrı şəxslər özlərinin tabeliyində olan silahlı dəstələr saxlamaqla məşğul olurdular. Nizami ordunun olmaması Ermənistanla sərhəd rayonların müdafiəsi işini çətinləşdirirdi. Yaranmış fürsətdən istifadə edən ermənilər Kəlbəcərdə mülki əhaliyə qəddarcasına hücumlar həyata keçirərək insanları qətlə yetirmiş və insanlığa qarşı qanlı cinayət törətmişlər. Ölkə rəhbərliyi tərəfindən isə Kəlbəcərin və rayon əhalisinin müdafiəsi üçün heç bir iş həyata keçirilmirdi. Sanki Kəlbəcərdə heç nə baş vermirdi. Susqunluq, heç bir müqavimətin olmaması isə erməni silahlı dəstələrini daha da azğınlaşdırır, faciənin miqyasını genişləndirirdi. Ermənistan silahlı birləşmələri Kəlbəcəri işğal edərkən qanlı cinayət törədiblər və belə demək mümkündürsə, ermənilərin bu qanlı cinayətinin ortağı isə satqın, xəyanətkar, siyasi maraqlarını ümummilli maraqlardan üstün tutan AXC-Müsavat hakimiyyəti olub.
“Ermənilərin Kəlbəcərdəki bütün infrastrukturu, yaşayış yerlərini dağıtması, mədəniyyət və dini abidələri məhv etməsi, ekoloji terror həyata keçirməsi, Azərbaycan xalqına məxsus sərvətləri talan etməsi dünya miqyasında törədilmiş vandallıq və cinayətdir. Hətta Kəlbəcəri tərk edən zaman azərbaycanlılar arasında daha çox itkiyə nail olmaq üçün ermənilərin əraziləri, mülki obyektləri yenidən minalaması onların öz qəsbkar, terrorçu xislətlərindən əl çəkə bilmədiklərini göstərir. Evləri və meşələri yandırmaqları isə erməni vandalizminin sərhəd tanımadığından xəbər verir”, - deyə C.Osmanov qeyd edib.
Deputat diqqətə çatdırıb ki, Azərbaycan torpaqları işğalda altında olan müddət ərzində münaqişənin sülh yolu ilə həllində maraqlı idi. Lakin Prezident İlham Əliyev hər zaman vurğulayırdı ki, sülh danışıqları əbədi ola bilməz, danışıqlar nəticəsiz olduğu halda Azərbaycan torpaqlarını hərb yolu ilə işğaldan azad edəcək. Ermənistan rəhbərliyinin təxribat xarakterli açıqlamaları və təmas xəttindəki hadisələr Azərbaycan Ordusunu əks-hücum əməliyyatlarına başlamasına vadar etdi. 44 günlük hərbi əməliyyatlar nəticəsində Müzəffər Ali Baş Komandan İlham Əliyevin rəhbərliyi ilə rəşadətli Ordumuz torpaqlarımızı işğaldan azad edərək ölkəmizin ərazi bütövlüyünü təmin etdi.
“Kəlbəcər rayonunun çox böyük hissəsi hərbi əməliyyatlar keçirilmədən, Ermənistanın kapitulyasiyasından sonra geri qaytarıldı. Bu, Azərbaycan dövlətinin və Azərbaycan Ordusunun gücündən xəbər verir. Azərbaycan dövləti və Ordusu isə Prezident İlham Əliyevin cəsarətli, prinsipial və düşünülmüş siyasəti nəticəsində sarsılmaz gücə sahib olub”, - deyə C.Osmanov bildirib.
Bölmənin digər xəbərləri
