Deputat: Azərbaycan dünya dövlətlərinin sıx əməkdaşlıq etmək istədiyi nüfuzlu və etibarlı ölkədir
Bakı, 10 mart, AZƏRTAC
Martın 1-də Prezident İlham Əliyevə zəng edən Fransa Prezidenti Emmanuel Makron dövlətimizin başçısı ilə Ukraynada cərəyan edən böhranlı vəziyyəti və humanitar dəstəyin göstərilməsi məsələlərini müzakirə ediblər. Bu o deməkdir ki, xarici ölkə rəhbərləri Prezident İlham Əliyevi dünyada baş verən böhranların və müharibələrin nizamlanmasında rolu olan bir Lider kimi görürlər. Çünki Prezident İlham Əliyevin xarici ölkə başçıları ilə yaratdığı dostluq münasibətləri hər bir müstəvidə məsələlərin müzakirə edilməsi üçün imkan yaradır. Bu gün Prezident İlham Əliyev Rusiya və Ukrayna prezidentləri ilə şəxsi dostluq münasibətləri olan çox azsaylı dövlət başçılarındandır. Böyük ölkələrin rəhbərləri də dövlətimizin başçısının qurduğu şəxsi dostluq münasibətlərinin beynəlxalq böhranlı məsələlərin həllinə töhfə ola biləcəyini anlayırlar. Ona görə də telefon danışıqlarında və görüşlərdə Azərbaycan Prezidenti ilə bu mövzuda fikir mübadiləsi aparılır.
Bu fikirləri AZƏRTAC-a açıqlamasında Milli Məclisin deputatı Azər Badamov deyib.
Deputat qeyd edib ki, bir ölkənin beynəlxalq siyasətdə uğur qazanması üçün onun böyük və ya kiçik olmasının əhəmiyyəti yoxdur. Burada əsas rol xüsusiyyət ölkəni təmsil edən liderin şəxsi kommunikativ keyfiyyətləri, diplomatik bacarığı, apardığı balanslaşdırılmış siyasət, beynəlxalq siyasətə inteqrasiya olunmaq iradəsi, təmsil olunduğu beynəlxalq təşkilatlarda aparıcı aktora çevrilə bilmək məharəti, təşəbbüsü və təşkilatçılığı ilə həyata keçirilən qlobal layihələrin aktuallığı və beynəlxalq aləmdəki rolu ilə ölçülür.
“Azərbaycanın bir çox dünya ölkələri ilə diplomatik əlaqələrinin qurulmasının 30 ili tamam olur. Bu müddətdə Azərbaycan dünya ölkələri ilə bağlarını möhkəmləndirib. Otuz il beynəlxalq diplomatiyada böyük zaman hesab olunmasa da, Azərbaycanın beynəlxalq platformalara inteqrasiya baxımından keçdiyi yola nəzər yetirdikdə dəyərli və böyük inkişaf illəri yaşadığımızı görürük. Bu gün dünyanın inkişaf etmiş bütün ölkələri Azərbaycanla diplomatik əlaqələrin yaradılmasından məmnunluğunu ifadə edir. Belə ki, xarici dövlətlərlə məmnunluğun möhkəmləndirilməsində Prezident İlham Əliyevin böyük rolu vardır. Dövlətimizin başçısının rəhbərliyi altında Azərbaycan dünyada dost, nüfuzlu və etibarlı tərəfdaş ölkə imicini formalaşdırıb”, - deyə deputat bildirib.
O əlavə edib ki, dünya ölkələrinin rəhbərləri ölkələrimiz arasında diplomatik əlaqələrin yaradılmasının 30 illiyi münasibətilə Prezident İlham Əliyevə zəng edir, təbrik məktubları göndərirlər. Məsələn, martın 8-də İtaliya Respublikasının Nazirlər Şurasının Sədri Mario Draqinin dövlətimizin başçısına zəng etməsini və Prezident İlham Əliyevin martın 9-da Böyük Britaniya Baş nazirinin Azərbaycan üzrə ticarət elçisi Baronessa Emma Nikolson ilə görüşməsini qeyd etmək olar. Xarici ölkə başçılarının Prezident İlham Əliyevə ünvanladıqları təbrik məktublarında, eyni zamanda, İtaliyanın Nazirlər Şurasının Sədri ilə telefon danışığı və Böyük Britaniyanın Azərbaycan üzrə ticarət elçisi ilə söhbət zamanı ölkəmizin regiondakı böyük rolu yüksək qiymətləndirilib. Həmçinin Azərbaycanın Avropanın enerji təhlükəsizliyinin təmin edilməsinə verdiyi töhfələrdən və ölkəmizlə əməkdaşlıqdan məmnunluq bildirilib. Bu gün Böyük Britaniya ölkəmizə ən çox investisiya yatıran ölkədir. Britaniya və İtaliya şirkətləri Azərbaycanın qeyri-neft sektoruna investisiyalar yatırırlar. Eyni zamanda, işğaldan azad olunmuş ərazilərimizdə yeni layihələrin icrasında bu ölkələrin şirkətləri yaxından iştirak edirlər. Bütün bunlar onu deməyə əsas verir ki, Azərbaycan dünya dövlətlərinin strateji əməkdaşlıq etmək istədiyi nüfuzlu və etibarlı ölkədir. Azərbaycanın bu imicini formalaşdıran isə Prezident İlham Əliyevdir.
Bölmənin digər xəbərləri
