Bakı, 3 iyun, AZƏRTAC

Azərbaycan, onun müxtəlif şəhərləri və xüsusilə Bakı region üçün əhəmiyyəti artmaqda olan tədbirlərin keçirildiyi mərkəzdir. Otuz müxtəlif ölkəni təmsil edən 249 şirkətin qatıldığı Bakı Enerji Həftəsi növbəti mötəbər tədbirlərdən biridir. Özündə müxtəlif layihələri, o cümlədən, 27-ci Beynəlxalq Xəzər Neft və Qaz, 10-cu Yubiley Xəzər Beynəlxalq Energetika və Bərpa Olunan Enerji sərgilərini və əvvəllər Xəzər Neft və Qaz Konfransı adı ilə tanınan Bakı Enerji Forumunu ehtiva edən regionun ən böyük sənaye tədbiri həm Azərbaycan, həm region, həm də dünya dövlətləri üçün böyük əhəmiyyət kəsb edir.

Bu hər bir iştirakçı üçün vacib nəticələr yarada bilər. Onlardan biri enerji təhlükəsizliyi və enerji ehtiyatların şaxələndirilməsi istiqamətində aparılan müzakirələrin və dialoqun daha da gücləndirilməsidir. Bakı Enerji Həftəsi çərçivəsində 27-ci Beynəlxalq Xəzər Neft və Qaz Sərgisinin rəsmi açılış mərasimi zamanı Prezident İlham Əliyev öz çıxışında bu məsələ barədə xüsusilə qeyd edərək bildirdi ki, “hər kəs anlayır ki, şaxələndirmə enerji təhlükəsizliyinin başlıca amillərindəndir. Biz isə enerji strategiyamızın həyata keçirilməsinin ilk günündən etibarən şaxələndirmə üzərində çalışmışıq”. Dövlətimizin başçısının rəhbərliyi ilə görülən işlərin nəticəsində artıq Azərbaycanın müxtəlif istiqamətə uzanan 3 neft və 4 qaz boru kəməri mövcuddur. Ölkəmiz 4 qonşu ölkəyə elektrik enerjisi ixrac edir və Avropaya elektrik enerjisi ixrac etməyi planlaşdırır. Bu şaxələndirilmiş ixrac marşrutları ilə yanaşı, yeni xətlər də nəzərdən keçirilir. Prezident İlham Əliyev bir daha Zəngəzur dəhlizinin fəaliyyəti, onun yalnız yüklər üçün deyil, elektrik enerjisi üçün mühüm ixrac marşrutu ola biləcəyi haqqında fikirlərini qeyd etdi.

Bunu Milli Məclisin Ailə, qadın və uşaq məsələləri komitəsinin sədri Hicran Hüseynova AZƏRTAC-a açıqlamasında deyib.

O bildirib ki, tanınmış beynəlxalq platforma və regionda neft-qaz sənayesinin əsas tədbiri olan Xəzər Neft və Qaz sərgisi Xəzər regionunun əsas neft-qaz layihələrini müzakirə etmək və enerji təhlükəsizliyinin təmini üçün ən yüksək səviyyəli şəxsləri bir araya gətirir. İlk sərgi Xəzər hövzəsində karbohidrogen ehtiyatlarının genişmiqyaslı işlənilməsi üzrə əsas istiqamətləri müəyyən edən və respublikanın neft tarixində yeni dövrün əsasını qoyan "Əsrin müqaviləsi"nin imzalanması ərəfəsində keçirilib. Həmin dövrdə ümummilli lider Heydər Əliyev Azərbaycanda neft-qaz sənayesi üzrə ilk ixtisaslaşdırılmış sərginin keçirilməsi təşəbbüsünü dəstəkləyib və o vaxtdan etibarən, Xəzər Neft və Qaz sərgisi neft, qaz və energetika sahəsinin aparıcı mütəxəssislərinin görüşdüyü və memorandumların, habelə gələcək əməkdaşlığa dair saziş və müqavilələrin imzalandığı məkana çevrilib. Burada neft-qaz hasilatı, maşınqayırma sənayesi, geologiya, bütün sahələr üzrə ixtisaslaşmış şirkətlər öz pavilyonları ilə iştirak edir. Bundan başqa, eyni zamanda, sərgi çərçivəsində elektroenergetika və alternativ enerji sahəsində fəaliyyət göstərən şirkətlər də təmsil olunur. Ümumiyyətlə, hər il sərgilərin keçirilməsi, ildən-ilə əhatə dairəsinin genişlənməsi, iştirakçıların sayının artması Ulu Öndər tərəfindən qoyulmuş və Prezident İlham Əliyevin uğurla davam etdirdiyi Azərbaycanın neft, enerji təhlükəsizliyi strategiyasının uğuru və təntənəsidir. Əlbəttə ki, bu gün əldə olunan nailiyyətlərdə bu tədbirlərin çox böyük rolu olub. Belə ki, o vaxt müstəqilliyini yenicə qazanmış, bir çox problemlərlə üzləşmiş, ərazisinin əhəmiyyətli hissəsi işğal olunmuş və bir çox çağırışlarla üzləşmiş Azərbaycana qlobal enerji şirkətlərinin diqqətinin cəlb edilməsində Xəzər Neft və Qaz Sərgi və Konfransı çox əhəmiyyətli rol oynayıb.

Deputat diqqətə çatdırıb ki, ötən dövrdə Azərbaycan öz enerji təhlükəsizliyinə sərmayə yatırıb, daxili bazarda tələbatları tam təmin edib və getdikcə sayı artan ölkələrin enerji təhlükəsizliyində mühüm rol oynamağa çalışıb.

Ölkəmizə göstərilən pozitiv münasibətin əsasında bir sıra amillərin dayandığını qeyd edən Hicran Hüseynova deyib: “Bunlardan ən vacibi etibarlılıqdır. Azərbaycan özünü etibarlı tərəfdaş və partnyor kimi artıq sübut edib, üzərinə götürdüyü bütün öhdəlikləri yerinə yetirib. Digər vacib məsələ isə Azərbaycanda olan siyasi və iqtisadi sabitlik, neft, qaz və elektrik enerjisi ilə bağlı infrastrukturun yaradılmasında əldə olunmuş uğurlar, nəticələrdir. Hazırda Vətən müharibəsini Qələbə ilə başa vuran Azərbaycan 30 ilə yaxın işğalda qalan tarixi ərazilərində nəhəng miqyaslı yenidənqurma işləri həyata keçirir. Qarabağda və Zəngəzurda aparılan yenidənqurma işləri iqtisadi potensialımızı artıracaq. Artıq Azərbaycan təkcə neft və qaz deyil, eyni zamanda, elektrik enerjisi ixrac edən ölkəyə çevrilib. Nəhəng potensial və təcrübə - bütün bu amillər mühüm enerji şirkətlərini cəlb etməyə və yenilənən enerjiyə investisiya yatırmağa imkan yaradıb.

Bu il Azərbaycanda dünyanın aparıcı enerji şirkətləri olan “ACWA Power” və “Masdar” şirkətləri ilə iki təməlqoyma mərasimi keçirilib. Hazırda biri günəş, digəri isə külək olmaqla, iki elektrik stansiyası inşa olunur ki, onların birgə istehsal gücü 470 meqavatdır. Gələn il istifadəyə veriləcək bu iki stansiya böyük prosesin əvvəlidir. Prezident İlham Əliyevin dediyi ki, ölkəmiz artıq yenilənən enerji sahəsində bir çox aparıcı enerji şirkətləri ilə fəal danışıqlar mərhələsindədir. Araşdırmalar da göstərir ki, Xəzər dənizinin Azərbaycan sektorunun potensialı 150 min meqavat təşkil edir. Bundan əlavə İkinci Qarabağ müharibəsi nəticəsində işğaldan azad olunan ərazilərin, xüsusilə də Kəlbəcər və Laçının potensialının 9-10 min meqavat olduğu hesab edilir”.

Deputat qeyd edib ki, sərgidə diqqəti çəkən məqamlardan biri də ABŞ dövlət katibinin enerji diplomatiyası üzrə müavininin müşaviri xanım Laura Loxmanın ABŞ Prezidenti Cozef Baydenin Azərbaycan Prezidenti İlham Əliyevə ünvanladığı məktubu oxuması oldu. Bu yaxınlarda ABŞ ilə Azərbaycan arasında diplomatik münasibətlərin qurulmasının 30 ili tamam oldu. ABŞ ötən dövrdə olduğu kimi, bu gün də Azərbaycanın sadiq tərəfdaşı kimi qalır. Məktubda əksini tapan önəmli məsələlərdən biri də Prezident İlham Əliyevin Azərbaycanın tam potensialına nail olunması, o cümlədən şaxələndirilmiş iqtisadiyyatın təşviqi, bərpaolunan enerji mənbələrinə investisiyaların yatırılması ilə iqlim dəyişikliyinə qarşı mübarizədə qlobal səylərə töhfənin verilməsi, qanunun aliliyi və hesabatlılığın möhkəmləndirilməsi, vətəndaşların yaşayış səviyyəsinin yüksəldilməsi istiqamətində davamlı addımlarının alqışlanmasıdır. Prezident İlham Əliyev tərəfindən həyata keçirilən siyasi, iqtisadi, sosial, hüquqi islahatlar və onların nəticələri həm ölkə daxilində, həm də ölkədən kənarda yüksək qiymətləndirilir, Azərbaycanın nüfuzunu artırır. Bütün bunlar bir daha göstərir ki, Azərbaycan Prezidenti İlham Əliyevin yürütdüyü balanslı siyasət, əsas hədəf və məqsədlərə nail olmaq üçün həyata keçirdiyi praqmatik və çevik strategiya, verilən qərarlar ölkəmizin iqtisadi, siyasi nüfuzunu artırmaqla yanaşı, regionda və dünyada sülhün, sabitliyin və təhlükəsizliyin təminində ölkəmizin iştirakını, mövqeyini daha da gücləndirir.