Deputat: Brüssel görüşlərində Azərbaycanın haqlı mövqeyi bir daha təsdiqləndi
Bakı, 19 dekabr, AZƏRTAC
Prezident İlham Əliyev Brüsseldə bir sıra rəsmi şəxslərlə görüşlərində növbəti dəfə siyasi uğurlara imza atdı. İstər NATO-nun Baş katibi Yens Stoltenberq, istərsə də Avropa İttifaqı Şurasının Prezidenti Şarl Mişel ilə görüşün nəticələri onu deməyə əsas verir ki, Azərbaycan Lideri ölkəsinin haqlı mövqeyini bir daha ortaya qoydu. Ən əsası odur ki, ölkəmizin mövqeyi dəstəkləndi.
Bunu AZƏRTAC-a açıqlamasında Milli Məclisin deputatı Kamilə Əliyeva söyləyib.
Deputat deyib ki, dövlətimizin başçısının da iştirak etdiyi NATO-nun Şimali Atlantika Şurasının iclasında Alyansa üzv dövlətlər tərəfindən ölkəmizin ərazi bütövlüyünə, suverenliyinə, beynəlxalq səviyyədə tanınmış sərhədlərimizin toxunulmazlığına bir daha dəstək ifadə olundu. NATO-nun Baş katibi bu təşkilatın tərkibində dünyanın bir çox dövlətlərində sülhyaratma missiyasında yaxından iştirak edən Azərbaycan hərbçilərinin əvəzsiz xidmətlərinə görə dövlətimizin başçısına təşəkkürünü bildirdi. Baş katib Azərbaycanın NATO-ya dost və müttəfiq ölkə olduğunu xüsusi vurğuladı.
Azərbaycan hər zaman dünyada sülhün və əmin-amanlığın bərqərar olunmasında iştirak edən istənilən ölkənin, beynəlxalq təşkilatın yanında olduğunu vurğulayan K.Əliyeva qeyd edib: "Prezident İlham Əliyevin apardığı uzaqgörən və müdrik xarici siyasətin nəticəsidir ki, NATO kimi mühüm alyans Azərbaycan-Ermənistan münasibətlərində ölkəmizin irəli sürdüyü ədalətli təklifləri dəstəklədi.
Prezident İlham Əliyev çıxışında və jurnalistlərin suallarına cavabında Zəngəzur dəhlizinin açılmasının zəruriliyini və bu dəhlizin əhəmiyyətini bir daha vurğuladı. Ermənistan ərazisindən keçməklə çəkiləcək dəmir yol xətti Azərbaycanı Naxçıvan Muxtar Respublikası ilə birləşdirməklə yanaşı, Ermənistanın Rusiya ilə dəmir yol əlaqəsinin yaranmasına da səbəb olacaq. Bu dəmir yolu xətti Ermənistan dövləti üçün də həyati əhəmiyyətə malik olacaq. Zəngəzur dəhlizi ilə avtomobil yolunun da açılması ən ümdə məsələlərdən biridir. Bu avtomobil yolunun tikilməsi və hansı istiqamətdən keçməsi barədə müzakirələr aparılacaq. Əgər Ermənistan tərəfi bu avtomobil yolu üzərində nəzarət sərhəd buraxılış məntəqəsi qurmaq fikrinə düşsə, Azərbaycan Laçın dəhlizində eyni addımlar ata bilər. Bu, beynəlxalq hüququn normaları çərçivəsində həyata keçirilən məsələ olacaq”.
Prezident İlham Əliyev, Avropa İttifaqı Şurasının Prezidenti Şarl Mişel və Ermənistanın baş naziri Nikol Paşinyan arasında baş tutmuş üçtərəfli görüşdə sərhədlərin delimitasiyası ilə bağlı ikitərəfli müvəqqəti işçi qrupunun yaradılması haqqında razılığa gəlinməsinə toxunan deputat bildirib ki, Azərbaycan tərəfinin hər zaman işğaldan azad edilmiş ərazilərin mina xəritələrinin təqdim olunması barədə qaldırdığı məsələ də görüşdə müzakirəyə çıxarıldı və Avropa İttifaqı bu məsələdə rəsmi Bakını dəstəklədi. Avropa İttifaqı bu istiqamətdə Azərbaycana texniki yardım etməyə hazır olduğunu da bildirdi. Eyni zamanda, kommunikasiya və nəqliyyat xətlərinin açılması məsələsi müzakirə edildi, Ermənistan tərəfi öz ərazisindən dəmir yolu xəttinin açılması ilə bağlı üzərinə düşən öhdəliyi yerinə yetirməyə hazır olduğunu bildirdi. İki ölkə arasında gömrük və sərhəd nəzarət məsələlərinin qarşılıqlı prinsip əsasında təmin olunması barədə də razılığa gəlindi.
"Avropa İttifaqı Şurasının Prezidenti Şarl Mişel üçtərəfli görüşün nəticəsinə dair yaydığı bəyanatda Cənubi Qafqazda sülhün bərqərar olması üçün Azərbaycanla Ermənistan arasında sülh müqaviləsinin imzalanmasının vacibliyi vurğulandı. Eləcə də dövlət sərhədlərinin delimitasiyası və demarkasiyası məsələsində Avropa İttifaqının dəstək verə biləcəyini qeyd etdi. Xüsusi qeyd etmək lazımdır ki, Şarl Mişel açıqlamasında 2020-ci il 20 noyabr, 2021-ci il 11 yanvar və 26 noyabr bəyanatlarından irəli gələn bütün öhdəliklərin yerinə yetirilməli olduğunu diqqətə çatdırdı. Bu, Avropa məkanında da Prezident İlham Əliyevin Ermənistan üzərində tam siyasi qələbəsi idi.
K.Əliyeva diqqətə çatdırıb ki, Brüssel görüşlərindən əvvəl bir sıra xarici siyasi ekspertlər və erməni siyasətçilər guya Avropanın Paşinyanın tələblərini yerinə yetirəcəyini söyləyirdilər. Onların bu arzuları da puça çıxdı. Brüssel görüşlərində də şərtləri diktə edən tərəf Azərbaycan oldu. Prezident İlham Əliyevin qətiyyətli mövqeyi və müdrik siyasəti nəticəsində Azərbaycanın irəli sürdüyü bütün təkliflər qəbul edildi. Bu, siyasətin nəticəsidir ki, hazırda dünyadakı siyasi və hərbi təşkilatlar Azərbaycanın mövqeyini qəbul edirlər.
Bölmənin digər xəbərləri
