CƏMİYYƏT
DİNİ ETİQAD AZADLIĞINDAN SUİ-İSTİFADƏYƏ YOL VERİLMƏMƏLİDİR
Mingəçevirdə Azərbaycanda dinlə bağlı vəziyyətə və dini qurumlarla iş sahəsində qarşıda duran məsələlərə həsr olunmuş müşavirə keçirilmişdir. Müşavirəni giriş sözü ilə şəhər icra hakimiyyətinin başçısı Məhəbbət Qarabağlı açmışdır. Dini Qurumlarla İş üzrə Dövlət Komitəsinin sədri Rafiq Əliyev məruzə ilə çıxış edərək, ölkəmizdə vətəndaşların dini-etiqad azadlığının təmin olunması, konstitusiyada təsbit edilmiş hüquqların sərbəst həyata keçirilməsi istiqamətində görülən işlərdən danışmışdır. Natiq konkret faktlarla bildirmişdir ki, Azərbaycanın sivil dünya birliyinə qovuşmasından, demokratik, hüquqi dövlət quruculuğu prosesinin dönmədən həyata keçirilməsindən narahat olan bəzi qüvvələr hər vasitə ilə buna mane olmağa, din pərdəsi altında respublikamızda ictimai-siyasi sabitliyi pozmağa çalışırlar. Dövlət orqanları, ictimai təşkilatlar, ziyalılar, dini-mənəvi, milli-əxlaqi dəyərlərimizin qorunub saxlanması, yad təsirlərdən müdafiəsi üçün fəallığını artırmalı, dini qurumların missionerlik pərdəsi altında genişlənən təfriqətçilik meyllərinə, dini ayrı-seçkiliyi yaratmaq cəhdlərinə qarşı qanunun gücü ilə qətiyyətlə cavab verməlidirlər.
Daha sonra müşavirə iştirakçılarını maraqlandıran suallara cavab verilmişdir.
Müşavirə iştirakçılarına Azərbaycan Respublikasında din-dövlət münasibətlərini tənzimləyən rəsmi sənədlər dərc olunmuş bülletenlər paylanmışdır.