DİRİ QUŞ SATIŞINA QADAĞA QOYULMUŞDUR
Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, bazarlarda, bazarətrafı ərazilərdə və yol kənarlarında diri ev quşlarının və vəhşi quşların satışına qadağa qoyulmuşdur. Tədbir köçəri quşların miqrasiyasının başlanması ilə əlaqədardır və profilaktiki xarakter daşıyır. Digər tərəfdən, sadalanan ərazilər baytarlıq-sanitar normalarına cavab vermir.
Qurumdan onu da bildirmişlər ki, sentyabrın 24-dən 28-dək Dövlət Baytarlıq Xidmətinin, Ekologiya və Təbii Sərvətlər, Səhiyyə nazirliklərinin, “Ovçular” Cəmiyyətinin mütəxəssisləri köçəri quşların ehtimal olunan müvəqqəti məskunlaşdıqları Abşeron yarımadası, Pirallahı adası, Dəvəçi, Salyan, Ağcabədi və Lənkəran rayonlarındakı milli qoruq və parklarda, ölkənin dəniz sahili zonalarında növbəti monitorinq aparacaqlar. Bu müddətdə quşçuluq və şəxsi təsərrüfatlardan qan nümunələri də götürüləcəkdir.
Müayinələrin nəticələri oktyabrın 6-da ictimaiyyətə açıqlanacaqdır.
Qeyd edək ki, köçəri və çöl quşlarının ovlanmasına, satılmasına, onlardan qida məhsulu kimi istifadə edilməsinə qoyulmuş qadağa hələ qüvvədədir.
Bölmənin digər xəbərləri
