Dobromir Karamarinov: Azərbaycan atletikası gələcəkdə qazanacağı uğurlarla da yadda qalacaq
Bakı, 24 noyabr, AZƏRTAC
"Ultramarafon yarışı Azərbaycanda qaçış idman növünə marağın böyük olduğunu sübut etdi".
AZƏRTAC xəbər verir ki, bu sözləri Avropa Atletika Assosiasiyasının prezidenti Dobromir Karamarinov Bakıda ultramarafon qaçışının mükafatlandırma mərasimindən sonra jurnalistlərə açıqlamasında deyib.
O bildirib ki, Cavid Qurbanov federasiya prezidenti seçildikdən sonra atletika sahəsində gələcək üçün böyük addımlar atılıb: “Sevindirici haldır ki, idmansevərlər bu marafonda bir araya gəldilər. İnanıram ki, Azərbaycan atletikası 100 illik tarixi boyu təkcə keçmiş uğurları ilə deyil, gələcəkdə qazanacağı nailiyyətlərlə də yadda qalacaq".
D. Karamarinov Azərbaycan Atletika Federasiyasının etibarlı tərəfdaş kimi Avropa Atletikası ailəsində əhəmiyyətli yerə malik olduğunu vurğulayıb.
Qeyd edək ki, marafonda kişilər arasında Üzeyir Söylemez, qadınlar arasında isə Leyla Abdinova birinci yerin sahibi olub.
Bölmənin digər xəbərləri
