DÖVLƏT GÖMRÜK KOMİTƏSİ MƏTBUAT XİDMƏTİNİN MƏLUMATI
Dövlət Gömrük Komitəsinin sədri, gömrük xidməti general-polkovniki Kəmaləddin Heydərov Pakistanın Azərbaycandakı fövqəladə və səlahiyyətli səfiri Faiz Məhəmməd Xosonu qəbul etmişdir.
Görüşdə Azərbaycan-Pakistan iqtisadi əlaqələrinin müxtəlif istiqamətləri üzrə müzakirələr aparılmışdır. Cənab Faiz Məhəmməd Xoso Azərbaycanın və Pakistanın dövlət rəhbərləri arasındakı yüksək səviyyəli münasibətlərin ölkələrimizin iqtisadi sahədə əlaqələrinə də müsbət təsir göstərdiyini vurğulamış, Azərbaycanda yaranmış əlverişli mühitdən Pakistan iş adamlarının yararlanmasının onun üçün çox xoş olduğunu söyləmişdir.
Görüşdə hər iki tərəf siyasi əlaqələrin yüksək səviyyədə olduğunu qeyd edərək, iqtisadi sahədə əməkdaşlığın sürətlənməsinin, ticarət-iqtisadi əlaqələrin inteqrasiyasının genişlənməsinin vacibliyini bildirmişdir.
Dövlət Gömrük Komitəsinin sədri Kəmaləddin Heydərov iki ölkə arasında siyasi əlaqələrin yüksək səviyyədə olduğu bir şəraitdə Pakistan iş adamlarının, investorlarının Azərbaycana gəlməsində, müxtəlif sahələrdə, xüsusilə pambıqçılıq sənayesinin inkişaf etdirilməsində, eləcə də adı çəkilən ölkənin dünyada tanınmış maşınqayırma məhsullarının istehsalının Azərbaycanda da qurulmasının vacibliyinə toxunmuşdur.
Görüşdə Pakistanla Azərbaycan arasında valyuta fransferi məsələlərində Pakistan bank sisteminin iştirakının məqsədəuyğunluğu da müzakirə edilən mövzulardan biri olmuşdur.
DGK sədri Kəmaliddin Heydərov Pakistan iş adamları ilə istənilən vaxt görüşməyə, ortaya çıxan hər hansı bir problemin həllinə bilavasitə yaxından kömək göstərməyə hazır olduğunu bildirmişdir.
Hər iki tərəf bu görüşün Azərbaycan-Pakistan iqtisadi əlaqələrinin intensivləşməsində mühüm rol oynayacagına əmin olduqlarını vurğulamışdır.
Bölmənin digər xəbərləri
