Dövlət İdarəçilik Akademiyasında 20 Yanvara həsr olunmuş konfrans
Bakı, 19 yanvar, İbrahim Əsədov, AZƏRTAC
Yanvarın 19-da Azərbaycan Respublikasının Prezidenti yanında Dövlət İdarəçilik Akademiyasında (DİA) 20 Yanvara həsr olunmuş elmi-praktik konfrans keçirilib.
AZƏRTAC xəbər verir ki, əvvəlcə tədbir iştirakçıları şəhidlərin əziz xatirəsini yad ediblər.
Konfransda DİA-nın rektoru, akademik Urxan Ələkbərov 1990-cı il yanvarın 19-dan 20-nə keçən gecə imperiya ordusunun Bakıda və ölkəmizin digər şəhər və rayonlarında törətdiyi qanlı hadisələrdən danışıb. Qeyd olunub ki, 20 Yanvarda Azərbaycan xalqına qarşı törədilmiş bu cinayət həm də bütün bəşəriyyətə, insanlığa qarşı həyata keçirilib.
U.Ələkbərov vurğulayıb ki, faciənin ertəsi günü ulu öndər Heydər Əliyev Azərbaycanın Moskva şəhərindəki daimi nümayəndəliyinə gələrək qanlı faciəni törədənlərə qarşı kəskin etirazını bildirib, günahkarların cəzalandırılmasını qətiyyətlə tələb edib.
Ümummilli Liderin təşəbbüsü ilə 20 Yanvara hüquqi-siyasi qiymət verildiyini xatırladan rektor bu qanlı hadisənin heç zaman yaddan çıxmayacağını bildirib.
Heydər Əliyev siyasətinin uğurlu nəticələrindən bəhs edən akademik U.Ələkbərov Ulu Öndərin ideyalarının Prezident İlham Əliyev tərəfindən əzmlə həyata keçirildiyini vurğulayıb.
Tədbirdə professor Həvva Məmmədova, dosentlər Elçin Əhmədov, Asif Qədirov və başqaları 20 Yanvar hadisələrinin dəhşətlərindən bəhs edib, şəhidlərin xatirəsinin daim əziz tutulacağını bildiriblər.
Bölmənin digər xəbərləri
