DÖVLƏT İDARƏÇİLİK AKADEMİYASINDA DÜNYA AZƏRBAYCANLILARININ HƏMRƏYLİYİ GÜNÜ İLƏ BAĞLI TƏDBİR KEÇİRİLMİŞDİR

29.12.2005 [21:34]
Çap et
A⁺ A^-

Azərbaycan Respublikasının Prezidenti yanında Dövlət İdarəçilik Akademiyasında 31 dekabr - Dünya Azərbaycanlılarının Həmrəyliyi Gününə və Yeni il bayramına həsr olunmuş yığıncaq keçirilmişdir.

Ümummilli liderimiz Heydər Əliyevin əziz xatirəsi yad olunmuş, Azərbaycan Respublikasının Dövlət himni səslənmişdir.

Akademiyadan AZƏRTAC-a bildirmişlər ki, bu ali məktəbin rektoru, əməkdar elm xadimi, professor Seyfəddin Qəndilov çıxış edərək, Dünya Azərbaycanlılarının Həmrəyliyi Gününün qeyd edilməsində ulu öndərimiz, qüdrətli şəxsiyyət Heydər Əliyevin tarixi rolundan danışmış, milli birliyimizin əhəmiyyətini və vacibliyini vurğulamışdır.

Ümummilli liderimizin ideyalarının Prezident İlham Əliyev tərəfindən əzmlə həyata keçirildiyini nəzərə çarpdıran rektor, eyni zamanda, ölkəmizin iqtisadiyyatının, elm və təhsilinin dinamik inkişaf etdiyini bildirmişdir.

Tədbirdə 31 dekabr - Dünya Azərbaycanlılarının Həmrəyliyi Günü və Yeni il bayramı münasibətilə Prezident İlham Əliyevə ünvanlanmış təbrik məktubu oxunmuşdur.

Təhsildə fərqlənən müəllim və tələbələrə Fəxri fərmanlar verilmişdir.

Sonda bayram konserti olmuşdur.