Dövlət Miqrasiya Xidməti pandemiya dövründə də əcnəbilərin məmnunluğunu diqqətdə saxlayıb
Bakı, 20 may, AZƏRTAC
Bütün dünyada hökm sürən pandemiya miqrasiya sahəsinə də təsirsiz ötüşməyib. Koronavirus xəstəliyinin (COVID-19) yayılmasının qarşısının alınması üçün Prezident İlham Əliyevin Sərəncamı ilə tərkibində Dövlət Miqrasiya Xidmətinin nümayəndəsinin də təmsil olunduğu Nazirlər Kabineti yanında Operativ Qərargah tərəfindən sistemli tədbirlər görülməklə yanaşı, miqrasiya məsələləri də diqqətdə saxlanılıb.
AZƏRTAC xəbər verir ki, bu barədə Dövlət Miqrasiya Xidmətinin (DMX) rəisi Vüsal Hüseynov mayın 20-də “Pandemiya dövründə Dövlət Miqrasiya Xidmətinin fəaliyyəti və ölkəmizdə olan əcnəbilərə göstərilən xidmətlər” mövzusunda keçirdiyi onlayn mətbuat konfransında məlumat verib.
Xidmət rəisi xüsusi karantin rejimi dövründə əcnəbilərin və vətəndaşlığı olmayan şəxslərin sağlamlığının və təhlükəsizliyinin qorunması, onların rahatlığının təmini, evdən çıxma səbəblərinin minimuma endirilməsi məqsədilə DMX tərəfindən bir sıra xidmətlərin yalnız elektron qaydada həyata keçirildiyini vurğulayıb. Bildirib ki, bu müddətdə sənəd qəbulu optimallaşdırılıb və icazə proseduru sadələşdirilib.
Vurğulanıb ki, ölkə ərazisində olan və məlum səbəblərdən Azərbaycanı tərk edə bilməyən əcnəbilərin ölkədə müvəqqəti olma müddətinin uzadılması üçün müraciət edilməsi zərurəti aradan qaldırılıb. Ölkədə olma müddəti bitən əcnəbilərin icazələri müraciət etmədən uzadılıb. Dövlət sərhədində tətbiq olunan məhdudiyyətlər aradan qaldırıldıqdan sonra həmin əcnəbilər qısa müddət ərzində ölkəni tərk edə biləcəklər.
Onlayn konfrans zamanı Vüsal Hüseynov dövlət-vətəndaş əlaqələrinin müasir texnologiyalar vasitəsilə təkmilləşdirilməsinin və elektron xidmətlərə sərbəst çıxışın təmin olunmasının günün reallığı olduğunu qeyd edib. Vurğulayıb ki, bununla bağlı Xidmət tərəfindən pandemiya dövründən əvvəl də elektron xidmətlərin geniş tətbiqi, onların keyfiyyətinin artırılması ilə bağlı zəruri tədbirlər görülürdü. Bu gün Xidmət tərəfindən bu işlər daha da sürətləndirilib. Görülən işlərin nəticəsidir ki, xüsusi karantin rejimi müddətində elektron xidmətlərdən istifadə edən əcnəbilərin sayı artıb. Belə ki, bu ilin martından mayın 15-dək DMX-nin müvəqqəti olma müddətinin uzadılması və iş-yaşama icazələri ilə bağlı elektron xidmətlərdən 6691 nəfər yararlanıb. Bu da ötən illə müqayisədə 24 dəfə çoxdur.
V.Hüseynov diqqətə çatdırıb ki, karantin müddətində DMX-nin 24 saat fasiləsiz fəaliyyət göstərən 919 - Çağrı Mərkəzi gücləndirilmiş iş rejimində çalışıb. Mart ayından mayın 15-dək Çağrı Mərkəzinə 92 min 967 zəng daxil olub. Qəbul edilən zənglərin 36 min 337-si müvəqqəti olma müddətinin uzadılması, 24 min 624-ü müvəqqəti yaşama, 2701-i iş, 2006-sı daimi yaşama icazələri, 1067-si inzibati xəta, 1444-ü vətəndaşlıq məsələləri, 4408-i olduğu yer üzrə qeydiyyat, 20 min 380-ni isə digər məsələlərlə bağlı olub. Bu da ötən illə müqayisədə təqribən dörd dəfə çoxdur. Xidmət rəisi Çağrı Mərkəzinə daxil olan müraciətlərin hər birinin diqqətdə saxlanıldığını və operativ şəkildə cavablandırıldığını bildirib. Bir daha əcnəbilərə istənilən məsələ ilə bağlı (012) 919 - Çağrı Mərkəzinə zəng edə bilmələrini xatırladıb.
DMX maarifləndirmə tədbirlərini də davam etdirib. Bütün zəruri məlumatlar həm Xidmətin internet saytı, “Facebook” və “Twitter” sosial hesabları, həm də (012) 919 - Çağrı Mərkəzi vasitəsilə əcnəbilərə çatdırılıb.
Bundan başqa, “Miqrasiya Könüllüsü” İctimai Birliyi Azərbaycanda sığınacaq almış, qaçqın statusu ilə yaşayan aztəminatlı əcnəbi ailələrə, yaşı 65-dən yuxarı tənha yaşayan şəxslərə dəstək məqsədilə xeyriyyə aksiyası təşkil edib.
Xidmət rəisi pandemiya dövründə görülən işlərlə yanaşı, DMX-nin nailiyyətlərindən danışıb. Bildirib ki, ölkəmizin milli və regional səviyyədə miqrasiyanın idarəedilməsi sahəsində əldə etdiyi uğurlardan biri ölkəmizin Miqrasiya və İnkişaf üzrə Qlobal Forumun Rəhbər Qrupuna üzv seçilməsi olub. Eyni zamanda, Xidmət tərəfindən beynəlxalq və yerli təşkilatlarla günün tələblərinə uyğun bir sıra onlayn videokonfransların təşkil olunduğu barədə məlumat verib.
Sonda Vüsal Hüseynov jurnalistləri maraqlandıran sualları cavablandırıb.
Bölmənin digər xəbərləri
