Dövlət Miqrasiya Xidmətinin Çağrı Mərkəzinə daxil olan müraciətlər operativ şəkildə cavablandırılır
Bakı, 20 may, AZƏRTAC
Xüsusi karantin dövründə Dövlət Miqrasiya Xidmətinin (DMX) fasiləsiz fəaliyyət göstərən 919 Çağrı Mərkəzi gücləndirilmiş iş rejimində çalışıb. Mart ayından mayın 15-dək DMX-nin Çağrı Mərkəzinə 92 min 967 zəng daxil olub.
AZƏRTAC xəbər verir ki, bunu Xidmət rəisi Vüsal Hüseynov mayın 20-də keçirdiyi onlayn mətbuat konfransında deyib.
V.Hüseynov bildirib ki, qəbul edilən zənglərin 36 min 337-si müvəqqəti olma müddətinin uzadılması, 24 min 624-ü müvəqqəti yaşama, 2 min 701-i iş, 2006-sı daimi yaşama icazəsi, 1067-si inzibati xəta, 1444-ü vətəndaşlıq məsələləri, 4408-i olduğu yer üzrə qeydiyyat, 20 min 380-ni isə digər məsələlərlə bağlı olub. Bu da ötən illə müqayisədə təqribən dörd dəfə çoxdur.
Xidmət rəisi Çağrı Mərkəzinə daxil olan müraciətlərin hər birinin diqqətdə saxlanıldığını və operativ şəkildə cavablandırıldığını bildirib. O, əcnəbilərə istənilən məsələ ilə bağlı (012) 919 - Çağrı Mərkəzinə zəng etmələrini bir daha xatırladıb.
Bölmənin digər xəbərləri
