Dövlət Proqramı Azərbaycanın su təhlükəsizliyi üzrə uzunmüddətli strateji baxışının ifadəsidir
Bakı, 14 yanvar, AZƏRTAC
Prezident İlham Əliyevin sədrliyi ilə Bakı şəhəri və Abşeron yarımadasında su təchizatı, tullantı və yağış suları sistemlərinin təkmilləşdirilməsinə dair 2026-2035-ci illər üzrə Dövlət Proqramına həsr olunan müşavirədə bu istiqamətdə görülən işlərdən, qarşıda duran vəzifələrdən bəhs edildi. Dövlətimizin başçısı müşavirədə Bakı şəhərinin və Abşeron yarımadasının su problemlərinin həlli məsələləri istiqamətində atılan zəruri addımları diqqətə çatdırdı. Bununla yanaşı, həyata keçirilən infrastruktur layihələrinin əhəmiyyətinə toxunuldu.
Bu sözləri AZƏRTAC-a açıqlamasında YAP Təftiş Komissiyasının sədri, Milli Məclisin deputatı Sevinc Hüseynova deyib.
O qeyd edib ki, ölkəmizdə etibarlı su təminatı ilə bağlı son illər ərzində genişmiqyaslı infrastruktur layihələri icra olunub. Paytaxt Bakı ilə yanaşı, bölgələrdə əsas infrastruktur məsələlərinin həlli istiqamətində zəruri işlər görülüb. Ötən iyirmi il ərzində bir neçə regional inkişaf proqramı qəbul olunub ki, beşillik dövrü əhatə edən bu istiqamətlər üzrə nəzərdə tutulan bütün layihələr uğurla icra edilib. Bunun nəticəsində bölgələrdə əsas infrastruktur məsələləri öz həllini tapıb. Elektrik enerjisi və qaz təchizatı ilə bağlı əsas vəzifələr icra olunub. Dövlətimizin başçısı da bu sahədə yeni mərhələnin başlanıldığını bəyan edib. Bu yaxınlarda yeni külək elektrik stansiyasının açılışında səslənən fikirlər bu xüsusda mühüm önəm kəsb edir. Sözsüz ki, Azərbaycan bu gün öz tələbatını ödəməklə yanaşı, vacib enerji ixracatçısıdır. Hazırda ölkəmizdə qazlaşma proqramının icra səviyyəsi 96 faizə yaxındır. Bütün bunlar isə son 20 il ərzində aparılan infrastruktur layihələri arasında xüsusi yer tutan əsas amillərdir. Ölkəmiz qazlaşma məsələsində daxili tələbatı ödəməklə yanaşı, dünyanın 10-dan çox ölkəsinə qaz ixrac edir ki, yaxın dövrdə bunların da sayı artacaq.
“Bu gün ölkəmizdə avtomobil yollarının inşası da geniş vüsət alıb. Magistral, kənd və şəhərlərarası yollarla bağlı layihələr uğurla icra olunur. İşğaldan azad edilmiş ərazilərdə bütün infrastruktur layihələrinin təminatı yüksək səviyyədədir. Elektrik enerjisi, generasiya gücləri, ötürücü xətlər, yollar, körpülər, tunellər, su təchizatı, qazlaşma və bütövlükdə uzun illər işğal altında qalmış ərazilər dirçəlir, həyata qayıdır və vahid infrastruktur şəbəkəsinə qoşulur. Bununla yanaşı, içməli su və suvarma layihələri də həmişə diqqət mərkəzində olub. Dövlətimizin başçısının da vurğuladığı kimi, bu gün əksər şəhərlərimizdə içməli su, kanalizasiya layihələri icra edilir. Son 20 il ərzində dörd böyük su anbarı inşa edilib. Bunlardan “Taxtakörpü”, “Şəmkirçay” su anbarları xüsusilə qeyd olunmalıdır. Eyni zamanda, azad edilmiş ərazilərdə içməli su və suvarma layihələri uğurla icra edilir. Son beş il ərzində bir neçə önəmli layihə başa çatıb. Vaxtilə Ermənistan tərəfindən dağıdılmış və yararsız vəziyyətə salınmış su anbarları əsaslı təmir edilib. Onların arasında, ilk növbədə, “Sərsəng” su anbarı qeyd edilə bilər. Bu, nəinki azad edilmiş ərazilərdə, bütövlükdə ölkəmizdə ən böyük su anbarlarından biridir. Dövlətimizin başçısı da xüsusilə qeyd etdi ki, vaxtilə torpaqlarımız işğal altında olanda Ermənistan dövləti bizə qarşı su terroru da həyata keçirirdi. Çünki “Sərsəng” və “Suqovuşan” su anbarlarının sularının bağlanması və sudan bir silah kimi istifadə edilməsi ölkəmizə böyük problemlər yaradırdı. Artıq “Suqovuşan”, “Sərsəng”, “Köndələnçay”, “Xaçınçay” və “Zabuxçay” su anbarları yenidən qurulub. Azad edilmiş ərazilərdə daha iki böyük su anbarının – “Həkəriçay” və “Bərgüşadçay” su anbarlarının tikintisi də nəzərdə tutulur”, - deyə deputat əlavə edib.
O bildirib ki, dövlətimizin başçısı müşavirədə, həmçinin dünyada iqlim dəyişikliyi ilə bağlı məsələlərə də diqqət çəkib. Vurğulanıb ki, bir çox ölkələr bundan zərər görür. Ölkəmizdə isə su təhlükəsizliyi ilə bağlı olan bütün məsələlər sistem şəklində öz həllini tapır. Bu xüsusda Bakının və Abşeron yarımadasının içməli su problemlərinin həlli istiqamətində zəruri addımlar atılır. Bununla bağlı vacib dövlət proqramı qəbul edilib. Bu proqramın əsas məqsədi Bakı və Abşeron yarımadasını dayanıqlı içməli su ilə təmin etməkdir. Proqram 2035-ci ilə qədər icra olunmalıdır. Sözsüz ki, su məsələsi artıq kommunal xidmət çərçivəsindən çıxaraq ictimai sağlamlıq, urbanizasiya, iqtisadi dayanıqlıq və sosial rifah məsələsinə çevrilib. Məhz bu kontekstdə 10 illik Dövlət Proqramının hazırlanması kompleks institusional yanaşmaya keçidin göstəricisidir. Su təchizatı sahəsində yeni Dövlət Proqramı da məhz bu ardıcıllığın davamıdır. Burada diqqətçəkən əsas məqam proqramın mərhələli, ölçülə bilən və nəticəyönümlü şəkildə planlaşdırılmasıdır. Su itkilərinin azaldılması, fasiləsiz təminatın faizlə ifadəsi, kanalizasiya əhatə dairəsinin genişləndirilməsi bu prosesdə hesabatlılığın əsas prinsip kimi götürüldüyünü göstərir.
Sevinc Hüseynova vurğulayıb ki, Dövlət Proqramının əsas dayaqlarından biri mövcud su təsərrüfatı infrastrukturunun köklü şəkildə yenilənməsidir. Yeni proqram çərçivəsində sutəmizləyici qurğuların modernləşdirilməsi, rəqəmsal ölçmə sistemlərinin tətbiqi, ağıllı idarəetmə mexanizmlərinin qurulması nəzərdə tutulur. Bu yanaşma yalnız suyun həcmini deyil, keyfiyyətini və davamlılığını da təmin etməyə yönəlib. Həmçinin bu gün kanalizasiya və yağış suları, şəhər ekologiyasının əsas elementi kimi qəbul edilir. Yeni Dövlət Proqramı çərçivəsində yağış suları üçün ayrıca kollektor şəbəkəsinin qurulması şəhər ekologiyası baxımından mühüm addım kimi qiymətləndirilir. Bu, Bakının iqlim dəyişikliklərinə adaptasiyası və şəhər mühitinin dayanıqlılığı üçün strateji əhəmiyyət daşıyır. Bütün bunların fonunda Prezident İlham Əliyevin müşavirədəki çıxışı göstərir ki, 2026-2035-ci illər üzrə Dövlət Proqramı, sadəcə, texniki sənəd deyil, Azərbaycanın su təhlükəsizliyi üzrə uzunmüddətli strateji baxışının ifadəsidir. Bu proqram urbanizasiya, iqlim dəyişiklikləri və sosial tələblər fonunda dövlətin qabaqlayıcı siyasət yürütmək niyyətini ortaya qoyur. Beləliklə, bu proqram Bakı və Abşeron yarımadasında həyat keyfiyyətini əhəmiyyətli dərəcədə yüksəldəcək, şəhər infrastrukturunu yeni inkişaf mərhələsinə çıxaracaq və Azərbaycanın dayanıqlı inkişaf modelini daha da möhkəmləndirəcək.
Bölmənin digər xəbərləri
