- Möhtərəm Prezident, cənab Ali baş komandan!

Azərbaycan sərhədçiləri üçün əlamətdar olan bu bayram ərəfəsində hərbi hissələrimizə döyüş bayraqlarının təqdim edilməsi mərasimində Zati-alinizin iştirakından qürur duyur, Sizi salamlayır və yaşadığımız bu anlarla fəxr edirik.

Möhtərəm Prezident!

Qurucusu Heydər Əliyev olan müstəqil Azərbaycan Respublikasının parlaq gələcəyi və xalqımızın tərəqqisi naminə gördüyünüz işləri daim dəstəkləyən Azərbaycan xalqı bu gün ətrafınızda sıx birləşmişdir. Xalqın Sizə inam və etibarı ölkənin qüdrətlənməsinə, işğal altında olan torpaqlarımızın geri qaytarılmasına, hər bir ölkə vətəndaşının rifahının yaxşılaşdırılmasına yönəlmiş fəaliyyətinizin məntiqi nəticəsidir. Xalqımızın Heydər Əliyev siyasətinin davamına olan bu dəstəyi əbədi, sarsılmaz və tükənməzdir. Çünki Siz məqsədi qüdrətli Azərbaycan yaratmaq olan əbədi baş sərkərdəmizin ölməz ideyalarının təminatçısısınız.

Cənab Ali baş komandan,

Cənab generallar, zabitlər, gizirlər və əsgərlər!

Heydər Əliyev xalqımız üçün təkcə rəhbər deyil, Azərbaycanın tərəqqisini təmin edən bir şəxsiyyət, həyatını xalqın inkişafına həsr etmiş bir insan, Azərbaycanın ləyaqət və cəsarət simvoludur.

Böyük fəxarət hissi ilə vurğulayıram ki, dahi öndərimizin Vətən və xalq qarşısındakı xidmətlərinin başlanğıc nöqtəsi hazırda Dövlət Sərhəd Xidmətinin mərkəzi aparatı yerləşən bu möhtəşəm binada olmuşdur. Vaxtilə ümummilli liderimiz bu binada çalışmış, dövlət təhlükəsizliyi orqanının rəhbəri vəzifəsinə yüksəlmiş, o dövrün mövcud ideologiyasına baxmayaraq, Azərbaycanda milli ruhun sıxışdırılmasına, görkəmli şəxsiyyətlərin məhvinə yol verməmiş, əksinə, milli ruhu yüksəltmiş, milli mədəni dəyərlərimizi qırmızı terrordan qorumuşdur. 35-40 il bundan öncə azərbaycançılıq ideyaları, milli özünüdərk ideyaları dahi öndərimiz tərəfindən məhz bu binada düşünülmüş, Azərbaycanın gələcəyinə ünvanlanaraq, dövlətimizin müstəqilliyinə zəmin yaratmışdır. Azərbaycan Respublikası Dövlət Sərhəd Xidmətinin yaranması, formalaşması və bugünkü səviyyəyə çatması da dahi öndərimizin adı ilə bağlıdır. Yaxşı bilirik ki, hələ SSRİ zamanı Azəbaycan ərazisindəki bir çox sərhəd dəstələrinin, zastava və məntəqələrin yaradılmasının təşəbbüskarı və təşkilatçısı məhz Heydər Əliyev olmuşdur.

Məzunu olduğum Cəmşid Naxçıvanski adına hərbi liseyi, doğma övlad qədər sevdiyi bənzərsiz hərbi təhsil ocağını yaradarkən də ümummilli liderimiz bu günümüzü düşünürdü. Biz sərhədçilər bu gün bir daha ulu öndərimizin xatirəsi önündə ehtiramla baş əyir, o dahi şəxsiyyətin müqəddəs ruhuna hörmət və ehtiramımızı bildiririk. Biz Heydər Əliyev ideyalarına sədaqətin əsgərləriyik.

Möhtərəm Prezident, ümummilli liderimizin ideyaları, göstəriş və tapşırıqları fəaliyyət proqramımızın əsasını təşkil edir. Sizin rəhbərliyiniz və qayğınız sayəsində bu ideyaların həyata keçməsi üçün səylərimizi əsirgəmirik. Təməli böyük öndər tərəfindən qoyulmuş Azərbaycan sərhəd siyasətinin uğurlu davamı olan Dövlət Sərhəd Xidməti inkişaf edən, dövlət sərhədlərinin etibarlı mühafizəsini təşkil etməyə qadir olan bir quruma çevrilmişdir.

Bu gün Zati-alinizdən döyüş bayraqlarını almağın, onu uca tutmağın, bu bayraqlar altında təlimlərdə, döyüşlərdə hərəkət etməyin, uğur qazanmağın, müqəddəs sərhədlərimizi göz bəbəyi kimi qorumağın məsuliyyətini başa düşür və buna hər an hazır olduğumuzu bildiririk. Sizin əmanət etdiyiniz əsgəri şərəf, şücaət və şöhrət rəmzi olan bu döyüş bayraqları hər bir sərhədçiyə Vətənə xidmət etmək, öz canını və qanını əsirgəmədən onu müdafiə etmək, hər qarışını qorumaq, işğal altında olan torpaqlarımızı azad etmək borcunu xatırladacaqdır.

Möhtərəm Prezident, cənab Ali baş komandan!

Sizi əmin edirəm ki, Dövlət Sərhəd Xidmətinin şəxsi heyəti Azərbaycan Respublikasının Prezidentinə, dövlətinə və xalqına sədaqətlə xidmət edəcək, dövlətçiliyimizin keşiyində mətin duracaq, qarşımızda qoyduğunuz vəzifələri layiqincə yerinə yetirəcək, Vətən sərhədlərinin qorunmasında daha yüksək nailiyyətlərin əldə edilməsi üçün səy və bacarığını əsirgəməyəcəkdir.

X X X

Azərbaycan Prezidenti, Ali baş komandan İlham Əliyev mərasimdə nitq söylədi (Dövlətimizin başçısının nitqi qəzetin bugünkü nömrəsinin birinci səhifəsində dərc olunur).

X X X

Prezident İlham Əliyev Dövlət Sərhəd Xidmətinin bur qrup hərbi qulluqçusuna orden və medallar, təzə mənzillərin orderlərini təqdim etdi.

X X X

Respublikamızın rəhbəri İlham Əliyev Dövlət Sərhəd Xidmətinin mərkəzi aparatının binasında müasir standartlar səviyyəsində yaradılmış idman salonuna baxdı, müasir idman qurğuları və avadanlığı, soyunub-geyinmə otaqları, “Sərhədçi” Olimpiya İdman Kompleksinin maketi və fotoşəkilləri ilə tanış oldu.

Dövlət Sərhəd Xidmətinin rəisi Elçin Quliyev məlumat verdi ki, 2002-ci ildə Prezidentə sərhədçilərin fiziki hazırlığının yüksəldilməsi üçün “Sərhədçi” Olimpiya İdman Kompleksinin tikilməsi barədə müraciət olunmuşdu. 2003-cü ilin əvvəlindən tikintiyə başlanmışdır. Əvvəllər həmin ərazidə kino-konsert salonu tikmək istəmişdilər, lakin yarımçıq qalmışdı. Sizin göstərişiniz əsasında biz ilkin olaraq belə bir layihə hazırlamışıq. Mütəxəssislərin rəyi ilə buradakı yarımçıq bina tamamilə sökülür. Kompleks beynəlxalq standartlara uyğun futbol stadionundan, örtülü hovuzdan, kiçik futbol meydançasından, mehmanxanadan, tennis kortlarından və min nəfər tamaşaçı tutan universal idman salonundan ibarət olacaqdır.

Hazırda tikinti işləri davam etdirilir. Çox nadir bir kompleks olacaqdır. Sərhədçilər Sizin diqqətinizi daim hiss edirlər. Yeni kompleksin tikilməsi də bu qayğının canlı təcəssümüdür. 2006-cı ilin sonunda inşaat işləri başa çatdırılacaqdır.

İLHAM ƏLİYEV: Xarici görünüşü də çox yaxşıdır. Hər cür şərait olacaq -hovuz, mehmanxana, futbol meydançası və s. çox gözəldir.

X X X

Dövlətimizin başçısı DSX-də yeni yaradılmış istintaq-təhqiqat şöbəsinə də baş çəkdi.

Bildirildi ki, bu şöbə Prezidentin sərəncamı ilə yaradılmışdır. Azərbaycanda Daxili İşlər Nazirliyi və Baş Prokurorluqdan sonra Dövlət Sərhəd Xidmətində də istintaq işlərinin aparılması üçün müvafiq şöbə fəaliyyət göstərir. Burada hər bir müstəntiq üçün lazımi iş şəraiti yaradılmışdır, bütün işlərə kompüterlər vasitəsilə şöbənin rəisi tərəfindən nəzarət olunur.

Prezident İlham Əliyev otaqların əvvəlki və indiki görünüşünü əks etdirən fotoşəkillərə baxdı, şöbədə yaradılmış müasir iş şəraitini yüksək qiymətləndirdi.