- Möhtərəm Prezident!

Cənab Ali baş komandan!

Dövlət Sərhəd Xidmətinin mərkəzi aparatına gəlişinizlə bu günü Azərbaycan sərhəd mühafizə tarixinə həkk etdirdiniz!

Hər bir sərhədçini dövlət sərhədinin toxunulmazlığını və təhlükəsizliyini təmin etməyə çağıran döyüş bayraqlarını Silahlı Qüvvələrin Ali baş komandanından qəbul etmək şərəfini bizə nəsib etməyinizi, Heydər Əliyev Elmi Araşdırmalar Mərkəzi ilə tanışlığınızı, əməkdaşlarımızın ali hərbi rütbələrə, yüksək dövlət təltiflərinə, orden və medallara layiq görülmələrini, xidmətdə fərqlənmiş hərbi qulluqçulara mənzil orderlərinin verilməsini Azərbaycan sərhədçilərinə göstərilən böyük etimad kimi qəbul edir, Sizə dərin təşəkkür və minnətdarlığımızı bildirirəm.

Xalqın inam və etibarına arxalanan liderin nəyə qadir olduğunu bəşəriyyətə nümayiş etdirmiş, bununla da bütün ölkə başçıları üçün örnək ola biləcək dövlət lideri etalonu yaratmış dahi öndər Heydər Əliyevin xalqımız və dövlətçiliyimiz qarşısındakı xidmətləri, Azərbaycanın tərəqqisi naminə fədakar fəaliyyəti onun dühası altında böyümüş hər bir Azərbaycan vətəndaşına yaxşı məlumdur. Heydər Əliyev irsi, Heydər Əliyev ideyaları, Heydər Əliyev məktəbi təkcə bugünkü deyil, gələcək nəsillərə, Azərbaycanımızın gələcəyinə məxsusdur. Heydər Əliyev Elmi Araşdırmalar Mərkəzinin əsas vəzifəsi bu zəngin irsi tədqiq etmək, xalqına, dövlətinə sədaqət nümunəsini yaddaşlarda həkk etdirmək, hər bir Azərbaycan sərhədçisini bu ruhda tərbiyə etməkdən ibarətdir.

Dahi rəhbərimizin illər boyu gördüyü işlər, gecəli-gündüzlü fəaliyyəti nəticəsində Azərbaycan vətəndaş müharibəsindən, parçalanmadan qurtulmuş, dövlətə və milli maraqlarımıza xidmət etməyən qüvvələrin hakimiyyətdə olması üzündən yaranmış böhranlar aradan qaldırılmış, Silahlı Qüvvələr möhkəmlənmiş, iqtisadiyyatımız dirçəlmiş, dünya miqyaslı beynəlxalq layihələrin həyata keçirilməsində Azərbaycanın iştirakı təmin olunmuş, Azərbaycan dünya siyasətinin bərabərhüquqlu iştirakçısına, regional mərkəzə çevrilmiş, mədəniyyətimiz, təhsilimiz, idmanımız və ölkə həyatının digər sahələri inamla inkişaf etdirilmişdir.

Öndərimizin fəaliyyəti də, şəxsiyyəti də Azərbaycan tarixinin ayrılmaz bir hissəsini, qızıl səhifələrini təşkil edir. Çünki ölkəmizin siyasi, iqtisadi, ictimai və mədəni həyatında əldə olunmuş bütün uğur və nailiyyətlər Heydər Əliyev adı ilə bağlıdır.

Möhtərəm Prezident!

Böyük öndərimizin uzun müddət çalışdığı bu binada Heydər Əliyev Elmi Araşdırmalar Mərkəzinin yaradılması zərurətdən doğur. Çünki sovet ideologiyasının tuğyan etdiyi, totalitar rejimin hökm sürdüyü bir dövrdə azərbaycanlının general rütbəsinə və DTK-nın sədri vəzifəsinə qədər yüksəlməsi ulu Tanrının xalqımıza ən böyük töhfəsi idi. O zamanlar xalq Heydər Əliyevin simasında öz xilaskarını, öz müdafiəçisini tapmışdı. Sirr deyil ki, dahi öndər Heydər Əliyevə qədər bu binada nə qədər günahsız soydaşlarımız qətlə yetirilmiş, qırmızı terrorun qurbanı olmuşdur.

Məhz dahi öndərimizin gördüyü işlər sayəsində insanların qorxu ilə yanından keçdikləri bu binanın pəncərələrindən xalqımızın taleyinə işıq düşmüş, müstəqillik, dövlətçilik, ədalət, milli tərəqqi, dünyəvilik kimi prinsipləri özündə birləşdirən milli azərbaycançılıq ideologiyasının əsası qoyulmuşdur.

Milli dövlətçiliyin əsas rəmzlərindən biri olan dövlət sərhədlərinin mühafizəsi məsələləri hər zaman öndərimizin diqqət mərkəzində olmuşdur. Ötən əsrin 60-cı illərinin sonunda dahi rəhbərimizin təşəbbüsü ilə Bakıda SSRİ Sərhəd Qoşunlarının Zaqafqaziya əlahiddə əməliyyat qoşun hissəsinin yaradılması, azərbaycanlı sərhədçilərin yüksək vəzifələrə irəli çəkilməsi, 1970-ci illər ərzində onun sərhəd dəstələrinə mütəmadi səfərlər etməsi, sərhədçilərin qayğıları ilə yaxından maraqlanması, məzunları zabit heyətimizin əsasını təşkil edən Cəmşid Naxçıvanski adına hərbi məktəbin yaradılması, SSRİ Sərhəd Qoşunlarının mərkəzdən maliyyələşdirilməsinə baxmayaraq, 1969-cu ildə Naxçıvan sərhəd dəstəsi, 70-ci illərin əvvəllərində Göytəpə sərhəd dəstəsi qarnizonlarının, Lənkəran sərhəd dəstəsinin “Qobustan” sərhəd zastavasının, cənub sərhədləri boyu sərhəd zastavalarının, sərhəd gözətçi gəmilər dəstəsində yeni tədris korpuslarının, Sərhəd Qoşunlarının hərbi hospitalının respublika büdcəsi hesabına tikilməsi Heydər Əliyev bəsirətinin göstəricisi olmaqla, əbədiyaşar liderimizin bu sahədəki xidmətlərinin yalnız bir hissəsini təşkil edir.

SSRİ dağıldıqdan sonra Azərbaycanın milli üçrəngli bayrağının silahlı qüvvələrimizdə ilk dəfə olaraq, 1992-ci ilin avqust ayının 22-də dahi öndər Heydər Əliyevin bilavasitə iştirakı ilə Naxçıvan sərhəd dəstəsində qaldırılması, sərhədçilərə Milli Qəhrəman adlarının verilməsi, şimal və şimal-qərb sərhədlərində ilkin zəruri infrastrukturun yaradılması, MDB-nin xarici sərhədlərini birgə qorumaq cəhdlərinin qarşısının qətiyyətlə alınması və Azərbaycanın öz sərhədlərini müstəqil qorumağa qadir olmasının sübut edilməsi, 1998-ci ildə “Sərhəd Qoşunları üçün zabitlərin hazırlanması” fakültəsinin yaradılması dövlət sərhədlərinin mühafizəsinə xüsusi diqqətin və Azərbaycan sərhədçilərinə qayğının təzahürüdür.

XXI əsrin başlaması ilə dünyada cərəyan edən qloballaşma prosesləri, Şərqdən Qərbə miqrasiya axınlarının genişlənməsi, beynəlxalq strateji nəqliyyat dəhlizlərinin ölkə ərazisindən keçməsi, müxtəlif kriminal qurumların Azərbaycan ərazisindən cinayətkar məqsədlərlə istifadə etmək cəhdləri, Azərbaycan ilə həmsərhəd olan dövlətlərdə vəziyyət, o cümlədən sərhədlərimizin bilavasitə yaxınlığında - Əfqanıstanda, Rusiya Federasiyasında və İraqda antiterror əməliyyatlarının aparılması, Ermənistanın ölkəmizə qarşı təcavüzü və digər bu kimi amillər dövlət sərhədlərimizin etibarlı mühafizəsinin vacibliyini ön plana çəkdi.

Xidməti vəzifələrin xüsusiyyətlərini nəzərə alaraq, 2002-ci il iyul ayının 31-də dahi öndərimiz Dövlət Sərhəd Xidmətinin yaradılması barədə qərar verdi və bununla da Azərbaycan dövlətçiliyi üçün dövlət sərhədlərinin etibarlı mühafizəsinin xüsusi əhəmiyyət daşıdığını nümayiş etdirdi.

“Sərhəd Qoşunları beynəlxalq terrorizmlə, təxribatçı qüvvələrlə mübarizədə ön sırada olmalıdır” deməklə, sərhədçilər qarşısında kütləvi qırğın silahlarının yayılmasına, narkotik maddələrin və silah-sursatın qanunsuz dövriyyəsinə, qaçaqmalçılığa qarşı mübarizə aparılması, dəniz sərhədlərinin mühafizəsinin gücləndirilməsi, o cümlədən neft yataqlarının, ixrac neft və qaz boru kəmərlərinin təhlükəsizliyinin təmin edilməsi kimi mühüm vəzifələr qoydu.

Beynəlxalq və ikitərəfli sərhəd əməkdaşlığının qarşılıqlı faydalılıq əsasında inkişafı, dost həmsərhəd dövlətlərin sərhəd mühafizə qurumları ilə münasibətlərin qurulması, müqabil dövlətlərlə sərhədlərimizin delimitasiyası, dövlət sərhədlərinin təhlükəsizliyinin təmin edilməsi sahəsində gördüyü işlər və qəbul etdiyi qərarlarla dahi öndərimiz milli sərhəd siyasətini formalaşdırmış, dövlət sərhədlərinin mühafizəsi konsepsiyasını yaratmışdır.

Möhtərəm Prezident!

Təməli dahi öndərimiz tərəfindən qoyulmuş dövlətçilik ənənələri Sizin tərəfinizdən uğurla davam etdirilir. Dövlət həyatının və ictimai həyatın bütün sahələrində olduğu kimi, Dövlət Sərhəd Xidmətinin də inkişafı və tərəqqisi üçün bütün şərait yaradılmışdır. Son müddətdə imzaladığınız bir sıra mühüm fərman və sərəncamların Dövlət Sərhəd Xidmətinin inkişafı üçün xüsusi əhəmiyyəti olmuşdur. Dövlər Sərhəd Xidməti hərbi qulluqçularının hərbi geyim formaları və fərqləndirmə nişanları, Sərhəd Qoşunlarının döyüş bayraqları təsdiq edilmiş, qüvvədə olan normativ-hüquqi aktlara əlavə və dəyişikliklər edilmiş, respublikanın inkişaf fondundan Dövlət Sərhəd Xidmətinin ehtiyacları üçün külli miqdarda vəsait ayrılmış, Dövlət Sərhəd Xidmətinin Naxçıvan sərhəd dəstəsinin bazasında sərhəd diviziyası, Dövlət Sərhəd Xidmətinin Sahil Mühafizəsi yaradılmış, hərbi qulluqçularımız orden və medallara layiq görülmüş, bir sıra əməkdaşlarımız ali hərbi rütbələr almış və ali hərbi rütbəli vəzifələrə təyin olunmuşlar.

Bununla yanaşı, tərəfimizdən hazırlanaraq təqdim edilmiş “Dövlət sərhədlərinin mühafizəsi sisteminin 2006-2010-cu illər üzrə texniki inkişafına dair Dövlət proqramı”nın həyata keçirilməsi Azərbaycan Respublikasının milli maraqlarının, dövlət sərhədinin toxunulmazlığının, ölkənin iqtisadi təhlükəsizliyinin təmin edilməsi, dövlət sərhədlərinin mühafizəsinin ən yüksək səviyyədə təşkil olunması üçün zəruri şərait yaratmaq məqsədi daşıyır.

Məruzə edirəm ki, Dövlət Sərhəd Xidmətinə göstərdiyiniz yüksək diqqət və qayğı sayəsində Zaqatala, Şəki və Horadiz sərhəd dəstələrinin, Səngəçal aviadəstəsinin qarnizonları, habelə 65 yeni sərhəd məntəqəsi inşa edilmişdir. Dəniz sərhədlərinin mühafizəsinin gücləndirilməsi və dənizdə neft-qaz infrastrukturunun təhlükəsizliyinin təmin edilməsi məqsədi ilə Xəzər dənizində müşahidə, axtarış və xilasetmə imkanlarımız inkişaf etdirilmiş, sərhəd gözətçi gəmiləri müasir naviqasiya və aşkaretmə avadanlığı ilə təchiz olunmuşdur.

Dəniz səthi üzərində fasiləsiz nəzarətin təşkil edilməsi üçün quraşdırılmış radarlar vasitəsilə daxil olan məlumatların vahid mərkəzdə toplanması və təhlili üçün Dövlət Sərhəd Xidmətinin Sahil Mühafizəsinin tərkibində Komanda idarəetmə mərkəzi fəaliyyətə başlamışdır. Sərhəd aviasiyası yaradılmış, qoşunların idarəetmə sistemi təkmilləşdirilmiş, nəzarət-buraxılış məntəqələrində sərhəd nəzarətinin təşkili beynəlxalq standartlar səviyyəsinə çatdırılmışdır.

Şəxsi heyətin sosial-məişət şəraitinin yaxşılaşdırılması məqsədi ilə Bakı şəhərində 48 mənzillik yaşayış evi, sərhəd dəstələrində 3 yaşayış binası, Abşeron rayonunun Goradil qəsəbəsində “Sərhədçi” istirahət mərkəzi, Dövlət Sərhəd Xidmətinin poliklinikası inşa edilmiş, hərbi hospital əsaslı təmir olunub zabit və gizirlərin istifadəsinə verilmişdir. Sizin göstərişiniz əsasında hazırda yeni kompleks sərhəd məntəqələrinin tikintisi davam edir.

Dövlət Sərhəd Xidmətinin beynəlxalq əlaqələri genişləndirilmiş, ABŞ-ın, Avropa ölkələrinin və həmsərhəd dövlətlərin sərhəd mühafizə orqanları ilə qarşılıqlı münasibətlər inkişaf etdirilmiş, NATO, Avropa İttifaqı, Beynəlxalq Miqrasiya Təşkilatı, BMT-nin Qaçqınlar üzrə Ali Komissarlığı ilə faydalı əməkdaşlıq əlaqələri qurulmuşdur.

Möhtərəm Prezident!

Cənab Ali baş komandan!

Bu gün hər bir Azərbaycan sərhədçisi Ali baş komandanın etimadını doğrultmaq üçün qüvvə və bacarığını əsirgəmir. Dövlət Sərhəd Xidmətinin rəhbər heyəti və hərbi hissə komandirləri bu müşavirədə iştirak edərək, Azərbaycan Respublikasının Prezidenti, Silahlı Qüvvələrin Ali baş komandanından birbaşa göstərişlər almağın məsuliyyətini dərk edir, etimadınıza layiq olmaq üçün şəxsi heyəti bütün göstərişlərinizin daha yüksək səviyyədə icrasına səfərbər etmək əzmindədirlər.

Dövlət Sərhəd Xidmətinin bütün şəxsi heyəti adından Sizi əmin edirəm ki, etibarınızı xidmətimizlə doğruldacaq və andımıza daim sadiq qalaraq, Azərbaycan Respublikasının Prezidentinə, dövlətinə və xalqına sədaqətlə xidmət edəcəyik. Vətənə, torpağa məhəbbətimiz və Heydər Əliyev ideyalarına sadiqliyimiz dövlət sərhədinin mühafizəsi işində bizə daha böyük qələbələr, uğur və nailiyyətlər qazandıracaqdır.

Cənab Ali baş komandan, məruzəm bitdi.

X X X

Azərbaycan Prezidenti, Ali baş komandan İlham Əliyev müşavirədə nitq söylədi.