DÖVLƏT TORPAQ SAHİBLƏRİNƏ YARDIM EDİR
2007-ci ildə Qax rayonunda kənd təsərrüfatı məhsulları istehsalçılarına əkin sahəsinin becərilməsində istifadə etdikləri yanacaq və motor yağlarına görə dövlət büdcəsindən 308 min 309 manat məbləğində yardım verilməsi qərara alınmışdır.
Bu barədə AZƏRTAC-a məlumat verən Qax Rayon İcra Hakimiyyəti başçısının aqrar məsələlər üzrə müavini, yardımın verilməsi üzrə rayon komissiyasının sədri İlqar Abbasov bildirmişdir ki, Azərbaycan Prezidentinin “Kənd təsərrüfatı məhsulları istehsalçılarına dövlət dəstəyi haqqında” 2007-ci il 23 yanvar tarixli Sərəncamı və bu sənədin icrası ilə əlaqədar Nazirlər Kabinetinin müvafiq qərarı ilə təsdiq edilmiş xüsusi Qaydalara uyğun olaraq yaradılmış rayon komissiyasına ötən müddətdə yardımla bağlı 2.534 nəfər torpaq mülkiyyətçisi ərizə ilə müraciət etmişdir.
Rayon komissiyası həmin müraciətlər əsasında kənd ərazi komissiyaları vasitəsi ilə yerlərdə araşdırmalar aparmış və Qax rayonu üzrə 7 min 707,74 hektar əkin sahəsinin becərilməsi üçün yardım verilməsini məqsədəuyğun hesab etmişdir. Materiallar baxılmaq üçün Respublika Komissiyasına təqdim edilmişdir. Komissiya Qax rayonu üzrə 2534 nəfər kənd təsərrüfatı məhsulları istehsalçısına yardım verilməsini məqbul hesab etmişdir. Hazırda yardımın verilməsi ilə əlaqədar “Kapital Bank” ASC-nin rayon filialında hazırlıq işləri aparılır.
Bölmənin digər xəbərləri
