Dövrünün şəxsiyyəti: Nikolay Baybakov – “ikinci” və “üçüncü” Bakının yaranması
Moskva, 30 aprel, AZƏRTAC
Moskvada faşizm üzərində Qələbənin 80 illiyinə həsr olunmuş “Baybakovun irsi” adlı tədbir təşkil edilib. V.İ.Vernadski adına Dövlət Geologiya Muzeyində keçirilən tədbirdə Nikolay Baybakovun yoldaşları, həmkarları, neft-qaz sektorunun təmsilçiləri, elmi ictimaiyyət və ictimai təşkilatların nümayəndələri iştirak ediblər.
AZƏRTAC xəbər verir ki, Azərbaycanın Rusiyadakı səfirliyinin müşaviri İsmayıl Əsədov səfir Rəhman Mustafayevin xoş arzularını iştirakçılara çatdırıb. O qeyd edib ki, ölkəmizdə Nikolay Baybakovun xatirəsini ehtiramla anırlar. Diplomat xatırladıb ki, bizim məşhur həmyerlimiz Azərbaycanın yüksək mükafatları – “Şöhrət” və “İstiqlal” ordenləri ilə təltif edilib.
Tədbir çərçivəsində N.Baybakov haqqında sənədli film nümayiş etdirilib. Filmdə onun Sabunçudakı evindən, təhsil aldığı məktəbdən, eləcə də “Şöhrət” ordeni ilə təltif olunması münasibətilə Ümummilli Lider Heydər Əliyevlə görüşündən nadir kadrlar yer alıb. Həmin mərasimdə Nikolay Konstantinoviç çıxış edərək müharibə illərində Azərbaycanın əhəmiyyətini xüsusi vurğuladı: “Bəlkə də heç bir respublika bu qədər iş görməyib. Ukrayna və Krasnodar işğal olunanda, bütün ümid yalnız Azərbaycana qalırdı. Biz cəbhəyə və xalq təsərrüfatına nefti Xəzər dənizinin o biri tayına sisternlərlə çatdırdıq. Vətənimin faşizm üzərində Qələbədə əhəmiyyətini bir daha vurğulamaq istərdim”.
İştirakçılar N.Baybakovun Azərbaycanla əlaqələrinə xüsusi diqqət yetiriblər. Rusiya Neft və Qaz Sənayeçiləri İttifaqının prezidenti Gennadi Şmalın AZƏRTAC-ın müxbiri ilə söhbətində vurğuladığı kimi, Nikolay Konstantinoviç ömrünün son günlərinə qədər Azərbaycanı öz vətəni hesab edirdi: “O, tez-tez Bakıda olur, onu Azərbaycanın ən yüksək ordeni ilə təltif etmiş Heydər Əlirza oğlu Əliyevlə görüşürdü. Onun təşəbbüsü ilə iri neft bölgələrinin Azərbaycan paytaxtının şərəfinə - Volqa-Ural vilayətinin “ikinci Bakı”, Tümenin “üçüncü Bakı” adlandırılması ənənəsi yarandı”.
Öz növbəsində, Rusiya Baş nazirinin keçmiş müavini Valeri Serov qeyd edib ki, N.Baybakov Bakıda doğulub boya-başa çatıb və onun bütün inkişafı Azərbaycanla bağlıdır. Təsadüfi deyil ki, o, Sovet İttifaqının neft-qaz sənayesinin inkişafında əsas fiqura çevrilib. V.Serov Azərbaycanda təhsil almış mütəxəssislərin Rusiyada neft-qaz sənayesinin inkişafında böyük rol oynadığını vurğulayıb: “Məhz onların əzmkarlığı sayəsində Sibirdə yataqların işlənməsinə başlanıldı. Qərbi Sibirə işləməyə göndərilən azərbaycanlı geoloq Fərman Salmanov regionun ən böyük neft-qaz yataqlarının aşkar edilməsində həlledici rol oynadı”.
Tədbirdə çıxış edənlər arasında Baybakov Fondu İdarə Heyətinin sədri Aleksandr Romaşin, neft sənayesi veteranı Anatoli Anisimov, MDU-nun professoru Yelena Vedutai və başqaları da olublar. Nikolay Konstantinoviçin nəvəsi, ictimai xadim Mariya Baybakova və nəticəsi, “LukOİL” şirkətinin əməkdaşı Pyotr Baybakov xatirələrini bölüşüblər.
Tədbirin sonunda Nikolay Baybakov adına mükafatlar təqdim olunub.
Nikolay Baybakov görkəmli dövlət xadimi, Sosialist Əməyi Qəhrəmanı, Lenin mükafatı laureatı, texnika elmləri doktorudur. O, Bakı neft mədənlərində mühəndis vəzifəsindən SSRİ Dövlət Plan Komitəsinin sədri və Sovet İttifaqı Nazirlər Soveti sədrinin müavini vəzifələrinə qədər yüksəlib.
Nikolay Konstantinoviç Belarusdan Bakıya gələn fəhlə ailəsində anadan olub. Valideynləri Nobel neft mədənlərində çalışıblar. O, Azərbaycan Neft İnstitutunu bitirib və peşəkar fəaliyyətinə Bakıda neft hasilatında innovativ texniki həllər təklif etməklə başlayıb.
Baybakov bütün həyatı boyu Azərbaycanla sıx əlaqə saxlayıb və ölkəmizi öz vətəni hesab edib. O, Azərbaycan SSR-dən SSRİ Ali Sovetinin deputatı olub, sonrakı illərdə Rusiya-Azərbaycan Dostluq Cəmiyyətinə rəhbərlik edib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
