Dünyanın nüfuzlu şirkətləri ilə əməkdaşlıq Azərbaycanın iqtisadi inkişafını sürətləndirir
Bakı, 19 yanvar, AZƏRTAC
Yanvarın 16-dan başlayaraq İsveçrənin Davos şəhərində Dünya İqtisadi Forumunun “Parçalanmış dünyada əməkdaşlıq” mövzusunda keçirilən 53-cü iclasında Azərbaycan Prezidenti İlham Əliyev, həmçinin Almaniya Kansleri Olaf Şolz, Niderlandın Baş naziri Mark Rutte, eləcə də BMT-nin Baş katibi Antonio Quterreş, Avropa Komissiyasının Prezidenti Ursula Fon der Lyayen, NATO-nun Baş katibi Yens Stoltenberq olmaqla, ümumilikdə 150-dən çox ölkədən 3 minə yaxın qonaq - hökumət və dövlət başçıları, iri sənaye korporasiyalarının və iqtisadi birliklərin rəhbərləri iştirak edirlər.
Politoloq Amid Əliyev AZƏRTAC-a açıqlamasında bildirib ki, builki Davos Forumu dünyada iki əsas hadisə- COVID-19-dan sonrakı dünya və Ukrayna-Rusiya müharibəsi fonunda yaranmış iqtisadi çətinliklər ətrafında daha çox fokuslanmış olacaq.
Bunun heç də təsadüfi olmadığını deyən politoloq qeyd edib ki, hər iki hadisə dünya iqtisadiyyatının müxtəlif sahələrinə nəzərəçarpacaq dərəcədə təsirlər edib. Eləcə də bu vəziyyətin davam etdiyi iki ilə yaxın müddət ərzində yeni biznes sahələri və iqtisadiyyatın əməkdaşlıq formaları təzahür edib. Ənənəvi iqtisadi əməkdaşlıq daha çox çevik və optimal olan və yeni çağırışlara cavab verə bilən iqtisadi münasibətlər sistemi ilə əvəzlənib.
“Əvvəlki Forumlardan fərqli olaraq builki Forumda Azərbaycanın iştirakı vacib və daha əhəmiyyətlidir. İkinci Qarabağ müharibəsində əldə edilən Qələbədən sonra Azərbaycan bölgədə yeni siyasi və eyni zamanda, iqtisadi reallıq yaradıb. Qarabağ iqtisadi rayonunda yeni iqtisadi modellərin yaradılması demək olar ki, dünyanın bir sıra iqtisadi mərkəzlərinin diqqətini cəlb edə bilib. “Ağıllı kənd” və “ağıllı şəhər” konsepsiyası, yeni yaşıl enerji mənbələrinin qurulması, müasir tendensiyalara uyğun idarəetmə prinsiplərinin tətbiqi və liberal iqtisadi qanunvericiliyin implementasiyası kimi vacib elementlər Azərbaycanın bu Forumda zəruri tərəfdaş qismində iştirakını təmin edir. Son iki il ərzində Azərbaycan tərəfindən həyata keçirilən enerji diplomatiyası isə Azərbaycanın regional və beynəlxalq səviyyədə etibarlı tərəfdaş olmasını bir daha sübut etdi. Bu, eyni zamanda, Azərbaycan üçün siyasi dividendlərin əldə edilməsinə yönəlmiş xarici siyasət kursudur. Yaddan çıxarmaq lazım deyil ki, Davos Forumu iqtisadi platforma olmaqla yanaşı, siyasi diskussiyaların aparılması və dividendlərin əldə edilməsi baxımından da vacib bir əməkdaşlıq platformasıdır. Məhz bu səbəbdən Davos Forumunda iştirak qarşılıqlı olaraq iqtisadi-siyasi münasibətlərin yeni mərhələsini müəyyən etmək üçün əhəmiyyətlidir”,- deyə Amid Əliyev vurğulayıb.
Onun fikirlərinə görə, Azərbaycan iqtisadiyyatının bütün sahələri üzrə göstəricilərinin son illər ərzində artması təbii ki, bu Forum daxilində iştirak edən iqtisadi, nəqliyyat və beyin mərkəzləri üçün olduqca cəlbedicidir. Bu göstəricilər son yarım il ərzində Rusiya-Ukrayna müharibəsi fonunda Azərbaycanın aktuallığını bir daha ortaya qoydu. Şərq-Qərb və Şimal-Cənub nəqliyyat dəhlizlərinin qovşağında yerləşən Azərbaycan məhz bu müharibə nəticəsində iqtisadi rentabelliyini itirmiş ənənəvi marşrutları uğurla əvəzləmək iqtidarına malikdir. Ölkəmiz həm də tranzit ölkə kimi, hava, dəniz, dəmiryolu və avtomobil daşımalarında mühüm aktor kimi çıxış edir. Çindən Avropaya qədər uzanan ticarət yolunun ən optimal variantı məhz Azərbaycan üzərindən keçir. Zəngəzur dəhlizinin açılması ilə bu optimallıq, eyni zamanda, iqtisadi dividendlərin artması ilə sintez olunacaq. Şərqi Zəngəzur iqtisadi rayonunda yeni nəqliyyat qovşağının yaradılması isə bu istiqamətdə daşınan yüklərin daha tez və iqtisadi cəhətdən sərfəli olmasını sığortalamış olacaq.
Politoloq deyib: “Son bir il ərzində Avropa və Orta Asiya məkanında bir sıra təşkilatlar və institutlarla əməkdaşlıq Azərbaycanın iqtisadi göstəricilərinin artımına müsbət təsir edib. Eyni zamanda, ərəb dövlətləri ilə əməkdaşlığın artırılması da Azərbaycana yeni investisiyaların yatırılması və bu regionda ölkəmizin siyasi mövqeyinin möhkəmlənməsi ilə müşahidə olunur. Təbii ki, qeyd olunan bütün bu faktlar Davos Forumunda Azərbaycanla əməkdaşlıq etmək və müvafiq sahələrdə yatırımlar və infrastruktur qurmaq istəyən dövlətlər üçün vacib göstəricilər hesab olunur. Artıq dünən dövlətimizin başçısı bir sıra şirkətlərlə görüşlər keçirdi. “Fortescue Future Industries” şirkəti ilə keçirilən görüşdə isə Azərbaycanın Energetika Nazirliyi ilə ötən ay imzalanan Memorandumda ölkəmizdə 12 min meqavat gücündə külək və günəş enerjisinin istehsalına dair layihənin icrası bir daha vurğulandı. Bununla yanaşı, Azərbaycanın enerji ixracında yaşıl enerjinin Avropaya çatdırılması məsələsi də müzakirə olundu. Digər daha vacib bir görüş isə Niderlandın “Damen Shipyards Group” şirkətinin icraçı direktoru və səhmdarı Arnout Damen ilə baş tutub. Görüş zamanı Azərbaycandan keçən tranzit yüklərinin həcminin 75 faiz artdığı və gələcəkdə bu rəqəmin daha da artırılması üçün ölkəmizin vacib nəqliyyat infrastrukturuna malik olduğu qeyd olunub”.
Ekspert əlavə edib ki, Forumun işində Azərbaycan Prezidentinin bir sıra enerji, nəqliyyat və digər siyasi mərkəzlər və eləcə də dövlət və hökumət başçıları ilə görüşləri keçiriləcək. Burada əsas məqam ondan ibarətdir ki, bu görüşlərdə Azərbaycan qəbul edən tərəf qismində çıxış edəcək. Bu da Azərbaycanın siyasi, iqtisadi və güc mərkəzi olmasına dəlalət edir.
Bölmənin digər xəbərləri
