Düşənbədə Azərbaycanın uğurlarından bəhs olunub
Düşənbə, 14 sentyabr, AZƏRTAC
Tacikistan Hökuməti yanında Strateji Araşdırmalar Mərkəzində (SAM) “Müstəqillik dövründə Tacikistan Respublikasının xarici siyasətinin əsas xüsusiyyətləri” mövzusunda elmi-təcrübi konfrans keçirilib.
Konfransda ölkəmizi Azərbaycanın Tacikistandakı səfiri Abbasəli Həsənov təmsil edib.
A.Həsənov çıxışında Azərbaycanın 1991-ci ilin oktyabr ayının 18-də müstəqillik əldə etdikdən sonra həyata keçirdiyi xarici siyasət kursundan danışıb. Səfir deyib: “Digər sovet respublikaları kimi Azərbaycan da öz müstəqilliyini SSRİ dağıldıqdan sonra əldə edib. Təəssüflər olsun ki, müstəqillik Tacikistan kimi, Azərbaycana da qansız başa gəlmədi. Hələ sovet hakimiyyəti dövründə - 1988-ci ildən başlayaraq Ermənistan Azərbaycana qarşı ərazi iddiaları ilə çıxış edərək müharibəyə başladı. 1993-cü ildə ölkəmiz vətəndaş müharibəsi ilə üzləşdi. Belə bir zamanda Azərbaycan xalqı ulu öndər Heydər Əliyevi hakimiyyətə dəvət etdi. Böyük siyasətçi ikinci dəfə hakimiyyətə qayıtdıqdan sonra 1994-cü ildə Bişkekdə Ermənistan ilə Azərbaycan arasında atəşkəs imzalandı. Respublikada sülh və sabitlik təmin edildi, ölkəyə xarici investisiyalar cəlb olundu. 1994-cü il sentyabrın 20-də dünyanın böyük neft şirkətləri ilə aparılan danışıqların nəticəsi olaraq “Əsrin müqaviləsi” imzalandı. Daha sonra Bakı-Tbilisi-Ceyhan əsas ixrac kəməri ilə ilk neft daşınması həyata keçirildi. Ulu öndər Heydər Əliyevin müəllifi olduğu neft strategiyası Azərbaycanın həm daxili, həm də xarici siyasətində həlledici amillərdən biri oldu”.
Diplomat Bakı-Tbilisi-Ərzurum qaz kəməri və Bakı-Tbilisi-Qars dəmir yolu layihələri haqqında da məlumat verib. Qeyd olunub ki, bu layihələr gələcəkdə Mərkəzi Asiya regionunu, eləcə də Tacikistanı Avropa ilə birləşdirəcək. Nəticədə Asiya-Qafqaz-Avropa nəqliyyat dəhlizi yaranacaq.
Səfir, həmçinin qeyd edib ki, multikulturalizm Azərbaycanın brendinə çevrilib. Azərbaycan Prezidenti İlham Əliyevin Sərəncamı ilə Bakıda Beynəlxalq Multikulturalizm Mərkəzi yaradılıb. Azərbaycan müxtəlif xalqların və dinlərin nümayəndələrinin azad və sülh şəraitində yaşadıqları bir ölkə olaraq dünyaya nümunəvi birgəyaşayış modeli təqdim edib. Bakı şəhərində Beynəlxalq Humanitar Forumun keçirilməsi artıq ənənə halını alıb. Forum ən geniş humanitar əməkdaşlıq məsələlərinin müzakirə edildiyi nüfuzlu bir məkana çevrilib.
Diplomat deyib ki, Azərbaycanın xarici siyasətindən danışarkən ölkənin birinci xanımı Mehriban Əliyevanın rəhbərlik etdiyi Heydər Əliyev Fondunun fəaliyyətini xüsusi qeyd etmək lazımdır. Fondun maliyyə dəstəyi ilə nəinki ölkə daxilində, həmçinin bir çox xarici ölkələrdə məktəblər, xəstəxanalar tikilir, mədəniyyət və tarixi abidələr təmir olunur.
Tədbirdə dövlət və hökumət nümayəndələri, alimlər, tədqiqatçılar, bir sıra ölkələrin Düşənbədəki səfirləri iştirak ediblər.
Qulu Kəngərli
AZƏRTAC-ın xüsusi müxbiri
Düşənbə
Bölmənin digər xəbərləri
