“ƏBƏDİ TURAN” KİTABININ TƏQDİMATI
Azərbaycan Yazıçılar Birliyinin Natəvan adına klubunda Hacı Azər Əbilovun “Əbədi Turan” kitabının təqdimatı olmuşdur.
Kitab bütün ömrünü böyük Cavidin şərəfli, eyni zamanda, faciəli həyatının, onun bənzərsiz yaradıcılığının öyrənilməsinə və xalqımıza çatdırılmasına sərf etmiş bir insana, ulu sənətkarımızın yadigarı Turan xanıma həsr olunmuşdur. Müəllif haqlı olaraq deyir ki, çoxları Caviddən yazıb elmi adlar uğrunda çəkişdiyi vaxtda bir övlad heç nəyə məhəl qoymadan daha dəyərli və gərəkli işlə məşğul olmuşdur. O, atasından qalan hər nə varsa qoruyub saxlamışdır. Onun elmi fəaliyyətinin istiqaməti Hüseyn Cavidin şair, dramaturq, mütəfəkkir kimi bütün haqları ilə bərabər küll hallında bərpasına yönəlmişdir.
Elm və mədəniyyət xadimlərinin, siyasətçilərin dəvət olunduğu tədbiri giriş sözü ilə Yazıçılar Birliyinin katibi, xalq şairi Fikrət Qoca açmışdır.
Azərbaycan Yazıçılar Birliyinin sədri, Milli Məclisin deputatı Anar, akademik Bəkir Nəbiyev, parlamentin deputatları Zəlimxan Yaqub, Səyyad Aran, tənqidçi Vaqif Hüseynli və başqaları çıxış edərək, Hüseyn Cavid yaradıcılığının böyüklüyündən danışmış, kitab haqqında öz təəssüratlarını söyləmiş və istedadlı müəllifə yeni yaradıcılıq uğurları arzulamışlar.
Axırda Turan Cavid çıxış etmiş, tədbir iştirakçılarına öz təşəkkürünü bildirmişdir.
Bölmənin digər xəbərləri
