Ədəbiyyatşünas-alimin yaradıcılığından bəhs edən kitabların təqdimatı olub
Bakı, 20 may, AZƏRTAC
AMEA Nizami Gəncəvi adına Ədəbiyyat İnstitutunun Müstəqillik dövrü Azərbaycan ədəbiyyatı şöbəsinin baş elmi işçisi filologiya elmləri doktoru Salidə Şərifovanın yaradıcılığından bəhs edən kitabların Azərbaycan Yazıçılar Birliyində təqdimatı keçirilib.
Bu barədə AZƏRTAC-a Ədəbiyyat İnstitutundan məlumat verilib.
Tədbirin moderatoru Əsəd Cahangir bildirib ki, təqdimatı keçirilən kitablardan biri Ədəbiyyat İnstitutunun Rəqəmsal ədəbiyyatşünaslıq və süni intellekt şöbəsinin müdiri dosent Zakirə Əliyevanın “Ədəbiyyatşünas-alimin elmmetrik pasportu seriyası”ndan “Filologiya elmləri doktoru Salidə Şərifovanın yaradıcılığı elmmetrik diapazonda” adlı monoqrafiyasıdır. Digəri isə Müstəqillik dövrü Azərbaycan ədəbiyyatı şöbəsinin böyük elmi işçisi Mənzər Niyarlının (Hüseynova) “Sənətkarın elmi pasportu” seriyasından “Salidə Şəmmədqızının kiçik bədii nəsri” adlı monoqrafiyasıdır.
Sonra “Salidə Şəmmədqızının kiçik bədii nəsri” monoqrafiyasının elmi redaktoru və “Elmi və bədii yaradıcılığı bir müstəvidə tədqiq edən ədib – Salidə Şəmmədqızı (Salidə Şərifova)” adlı ön sözün müəllifi filologiya elmləri namizədi, Milli Məclisinin deputatı Səyyad Aran çıxış edib.
Tədbirdə Elman Quliyev, Məmməd Əliyev, Vəli Qaraçaylı, Almaz Ülvi, Elşad Həsənov, Yaqub Babayev və başqaları çıxış edərək nəzəriyyəçi alim, Rusiya Təbiət Elmləri Akademiyasının həqiqi üzvü Salidə Şərifovanın yaradıcılığının elmmetrik diapazonda tədqiq edilməsini yüksək qiymətləndiriblər.
Tədbirdə çıxış edən Nuşabə Məmmədli, Mahirə Abdulla, Gülbəniz Babyeva, Yusif Nəğməkar, Dilarə Adilgil, Sabir Şahtaxtlı, Zəlimxan Şərifov, Leyla Məmmədova, Fidan Qasımova, Hüsniyyə Çobanova, Fərqanə Əliyeva, Müşfiq Borçalı, Kalına İbişova, Güləmail Murad hər iki kitabın xarakterik xüsusiyyətlərindən və elmi yeniliyindən danışıblar.
Sonra müəlliflər Mənzər Niyarlı və Zakirə Əliyeva, həmçinin Salidə Şərifova tədbir iştirakçılarına təşəkkürlərini çatdırıblar.
Bölmənin digər xəbərləri
