“Ədibin Evində Yüksəliş” silsilə görüşlərinin növbəti sessiyası
Bakı, 21 aprel, AZƏRTAC
“Yüksəliş” müsabiqəsi qaliblərinin fərdi inkişafı, intellektual potensialının gücləndirilməsi və dünyagörüşünün zənginləşdirilməsinə yönəlmiş təşəbbüslər çərçivəsində həyata keçirilən “Ədibin Evində Yüksəliş” silsilə görüşlərinin dördüncü sessiyası baş tutub.
Bu barədə AZƏRTAC-a müsabiqənin işçi qrupundan məlumat verilib. Sessiyada ADA Universitetinin rektoru Hafiz Paşayev, “Ədibin Evi” Ədəbiyyata Dəstək Fondunun təsisçilərindən BDU-nin professoru Ədibə Paşayeva, Üzeyir Hacıbəyli adına Bakı Musiqi Akademiyasının Humanitar fənlər kafedrasının müdiri filologiya elmləri doktoru, professor Tərlan Quliyev, gənclər və idman nazirinin müavini, “Yüksəliş” müsabiqəsinin işçi qrupunun rəhbəri Fərhad Hacıyev iştirak ediblər.
“Ədibin Evi”nin icraçı direktoru Şəfəq Mehrəliyeva bu kimi görüşlərin ədəbi-mədəni dəyərlərin təbliği, maarifləndirici müzakirələrin təşviqi, eləcə də iştirak edən qonaqların intellektual və estetik dünyagörüşünün formalaşması baxımından mühüm əhəmiyyət daşıdığını vurğulayıb.
Sessiya Əməkdar incəsənət xadimi Aqil Məlikovun təqdimatında “Mir Cəlalla ədəbiyyat səhifələrinə” mövzusuna həsr olunub. Əməkdar incəsənət xadimi Aqil Məlikov və muğam triosu Füzuli qəzəlləri ilə muğam parçalarını ifa edib. Musiqi və ədəbiyyatın vəhdətdə təqdim olunduğu sessiya iştirakçılar tərəfindən böyük maraqla qarşılanıb.
Daha sonra Mir Cəlalın “Füzuli Sənətkarlığı” elmi əsəri filologiya elmləri doktoru professor Tərlan Quliyev tərəfindən şərh edilib. Professor Tərlan Quliyev çıxışında Mir Cəlalın ədəbi-estetik baxışlarının Azərbaycan ədəbiyyatşünaslığında xüsusi yer tutduğunu qeyd edib, onun irsinin çağdaş oxucu üçün də aktuallığını qoruduğunu vurğulayıb. Tədbirdə qeyd olunub ki, Mir Cəlalın 1958-ci ildə nəşr olunmuş “Füzuli sənətkarlığı” əsəri Azərbaycan ədəbiyyatşünaslığında poetika məktəbinin əsasını qoyan fundamental tədqiqatlardan biri hesab olunur.
“Ədibin Evində Yüksəliş” silsilə görüşləri qaliblərin peşəkar inkişafı ilə yanaşı, onların mədəni və intellektual baxımdan da formalaşmasına töhfə verən mühüm platforma rolunu oynayır. Bu təşəbbüs iştirakçıların müxtəlif sahələr üzrə biliklərini dərinləşdirməyə, ədəbiyyat, mədəniyyət və düşüncə dünyası ilə daha yaxından təmas qurmasına imkan yaradır.
Qeyd edək ki, “Yüksəliş” müsabiqəsi çərçivəsində yalnız nəzəri biliklər deyil, eyni zamanda, analitik düşüncə, qərarvermə, məsuliyyət götürmə, komanda idarəetməsi və liderlik bacarıqları da qiymətləndirilir. Müsabiqə qalibləri Mentorluq proqramı, fərdi inkişaf planları və real layihələrdə iştirak imkanları əldə edərək peşəkar inkişaflarını davam etdirirlər. Müsabiqədə iştirak etmək üçün namizədlər Azərbaycan Respublikasının vətəndaşı olmalı, qeydiyyatın son gününə qədər 21-51 yaş aralığında olmalı, ali təhsilə və minimum 2 illik idarəetmə təcrübəsinə malik olmalıdırlar.
Xatırladaq ki, “Yüksəliş” müsabiqəsi Azərbaycan Prezidenti İlham Əliyevin 2019-cu il 26 iyul tarixli Sərəncamına əsasən, intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub. Altıncı “Yüksəliş” müsabiqəsinin keçirilməsi ilə bağlı Prezident İlham Əliyev tərəfindən 2025-ci il dekabrın 10-da müvafiq Sərəncam imzalanıb.
Bölmənin digər xəbərləri
