ƏDLİYYƏ NAZİRLİYİNDƏ QƏBUL
Martın 19-da ədliyyə naziri Fikrət Məmmədov Rumıniyanın ölkəmizdəki səfiri Tasın Cəmili onun xahişi ilə qəbul etmişdir.
Qonağı səmimi salamlayan nazir ölkələrimizin əməkdaşlıq və dostluq əlaqələrinin uğurla inkişaf etdiyini, bu əlaqələrin genişlənməsində Rumıniya səfirliyinin xidmətlərini razılıq hissi ilə vurğulamışdır. Nazir Azərbaycan Respublikası Prezidentinin rəhbərliyi ilə ölkəmizdə aparılan məhkəmə-hüquq islahatının müsbət nəticələri barədə məlumat vermiş, Azərbaycanın beynəlxalq nüfuzunun artmasını, bir çox dövlətlərlə hüquqi sahədə əməkdaşlığının möhkəmlənməsini, son illərdə Türkiyə, Rusiya, Litva və Niderlandın ədliyyə nazirlikləri ilə əməkdaşlıq haqqında sazişlərin imzalandığını, Rumıniya və Azərbaycanın hüquqi əməkdaşlığa maraq göstərdiyini vurğulamışdır.
Səmimi qəbula görə təşəkkürünü bildirən səfir ölkələrimiz arasında mehriban münasibətlərin daha da inkişaf etdirilməsi üçün görülən işlərdən, habelə azərbaycanlı gənclərin Rumıniyada müxtəlif ixtisaslar üzrə təhsil almasının təşkilindən bəhs etmiş, iqtisadi əməkdaşlığın genişlənməsinin hüquqi əməkdaşlığı şərtləndirdiyini, ədliyyə nazirlikləri arasında əlaqələrin hər iki tərəf üçün faydalı olacağını və bu barədə tezliklə müvafiq sazişin imzalanmasının əhəmiyyətini vurğulamışdır.
Bölmənin digər xəbərləri
