DÜNYA
EDUARD ŞEVARDNADZE: BORU KƏMƏRLƏRİ GÜRCÜSTANDA SABİTLİYƏ VƏ TƏHLÜKƏSİZLİYƏ YENİ TƏMİNATLAR YARADACAQ
Gürcüstan Prezidenti Eduard Şevardnadze Tbilisidə açılmış “Neft, qaz və energetika-2002” beynəlxalq konfransını mühüm tədbir adlandırmışdır. O, konfransda çıxış edərək demişdir ki, “Gürcüstan dünya birliyinin tam hüquqlu üzvü kimi, qlobal beynəlxalq proseslərdə fəal iştirak edir və mühüm coğrafi-siyasi rolu ilə birlikdə tranzit ölkə funksiyası əldə etmişdir”.
Şevardnadze hesab edir ki, Bakı-Tbilisi-Ceyhan neft kəmərinin və Bakı-Tbilisi-Ərzurum qaz kəmərinin tikintisi “Gürcüstanın sabit və təhlükəsiz inkişafı üçün yeni təminatlar yaratmağa imkan verəcəkdir”. O demişdir ki, neft və qaz kəmərləri layihələrinin həyata keçirilməsi, habelə vahid enerji dəhlizinin inkişafı “Gürcüstanın həm qonşu ölkələrin, həm də Avropa ölkələri və ABŞ-ın strateji mənafeləri orbitinə düşdüyünü” göstərir.