DÜNYA
Efiopiyada hökumət və sahibkarların qarşılıqlı əməkdaşlığı üçün onlayn-sistem işə salınıb
Əddis-Əbəbə, 5 avqust, AZƏRTAC
Efiopiyanın Dağ Mədən və Neft Sənayesi Nazirliyi bütün ölkə ərazisində hökumətlə sahibkarlar arasında qarşılıqlı əlaqələrin yaxşılaşdırılması üçün “Landfolio” onlayn-sisteminin işə salınmasını bəyan edib.
AZƏRTAC yerli KİV-ə istinadla xəbər verir ki, Efiopiyanın Dağ Mədən və Neft Sənayesi naziri Assefa Kumsa bildirib ki, bu sistem şirkətlərə nazirliklə həm xaricdən, həm də daxildən onlayn rejimdə əlaqə saxlamaq imkanı yaradır. Onun sözlərinə görə, sistem Efiopiyanın regional ştatlarının məlumat bazalarına inteqrasiya edilib və bu da həm vaxtın, həm də maliyyənin qənaətinə kömək edəcək.
“Landfolio” layihəsinin rəhbəri Fıtsum Assefa əlavə edib ki, yeni sistem nazirliyin fəaliyyətinin şəffaflığını və nazirliyə etimadı artıracaq, həmçinin bu sektorda səmərəli xidmətlər göstərəcək.
Bu sistem Efiopiya hökumətinin Kanadanın beynəlxalq resurslar və inkişaf institutu ilə əməkdaşlığı əsasında hazırlanıb.
Asya Hacızadə
AZƏRTAC-ın xüsusi müxbiri
Əddis-Əbəbə